Імёны беларускіх канкурсантаў на «Славянскім базары» будуць названы 8-9 красавіка

Імёны прадстаўнікоў Беларусі на конкурсе выканаўцаў эстраднай песні і дзіцячым музычным конкурсе, якія пройдуць падчас ХХII Міжнароднага фестывалю мастацтваў "Славянскі базар у Віцебску", будуць названы 8-9 красавіка. Пра гэта БЕЛТА паведаміла прэс-сакратар Міністэрства культуры Юлія Віскуб.

Другі этап адборачнага праслухоўвання пройдзе 8 красавіка (для дарослых артыстаў) і 9 красавіка (для дзяцей). Прафесійнае журы, у склад якога ўвайшлі вядомыя дзеячы культуры і мастацтва, праслухае ўдзельнікаў у суправаджэнні фанаграмы "мінус адзін". Па выніках першага этапу - адборачнага праслухоўвання відэаматэрыялаў - рашэннем экспертнай групы было адабрана 20 канкурсантаў, па 10 дарослых і дзяцей.

Па выніках другога этапу рашэннем журы адбіраецца адзін удзельнік на конкурс выканаўцаў эстраднай песні і два ўдзельнікі - на дзіцячы музычны конкурс.

Сярод прэтэндэнтаў на права абараняць Беларусь у Віцебску выканаўцы, якія заявілі пра сябе на іншых рэспубліканскіх і міжнародных конкурсах і фестывалях: Аляксей Грос (Нацыянальны адборачны тур да міжнароднага конкурсу песні "Еўрабачанне-2013"), Дар'я Шульгіна (Нацыянальны фестываль беларускай музыкі і паэзіі "Маладзечна-2012"), Ксенія Кубіна (фіналістка праекта "Спяваючыя гарады"), Аляксандра Лакціёнава (пераможца тэлепраекта АНТ "Я спяваю") і інш.

Фота: vitbichi.by