Імёны кандыдатаў у Прэзідэнты стануць вядомыя ў ліпені - ЦВК
Члены ініцыятыўных груп па вылучэнні кандыдатаў у Прэзідэнты будуць збіраць подпісы з 21 мая па 19 чэрвеня ўключна. Подпісныя лісты правяраюцца 20 дзён. "У перыяд з 5 па 14 ліпеня Цэнтральная камісія правядзе пасяджэнне, і тады народ даведаецца спісы кандыдатаў у Прэзідэнты. Яны ўсе атрымаюць бясплатны эфірны час на тэлебачанні і радыё, газетныя плошчы. Акрамя таго, ЦВК вырабіць інфармацыйныя буклеты з кароткімі біяграфічнымі звесткамі кожнага з кандыдатаў", - распавяла Лідзія Ярмошына.
Адказваючы на пытанне аб запрашэнні на выбары міжнародных назіральнікаў, старшыня ЦВК праінфармавала, што ён пакуль не вырашаны. "Пытанне з замежнымі назіральнікамі пакуль не вырашана з улікам складанай абстаноўкі. Мы вернемся да яго крыху пазней, можа быць, у чэрвені", - адзначыла кіраўнік Цэнтрвыбаркама.
Як паведамлялася, Палата прадстаўнікоў прызначыла прэзідэнцкія выбары на 9 жніўня. Датэрміновае галасаванне адбудзецца з 4 па 8 жніўня. Вынікі выбараў Цэнтрвыбаркам павінен падвесці не пазней 19 жніўня. Другі тур, калі ў ім будзе неабходнасць, па плане павінен прайсці не пазней чым у двухтыднёвы тэрмін, гэта значыць 23 жніўня.