У Віцебску ствараецца інавацыйны цэнтр бяспекі з інтэрактыўным асяроддзем

У Віцебску ствараецца інавацыйны цэнтр бяспекі з інтэрактыўным асяроддзем для практычнага навучання дзяцей дзеянням у выпадку НС. Пра гэта паведаміў начальнік аддзела нагляду і прафілактыкі абласнога ўпраўлення МНС Аляксандр Сычоў падчас круглага стала, прысвечанага адзінаму дню прафілактыкі траўматызму, у Віцебскім абласным дзіцячым клінічным цэнтры.

"Вядзецца праца па стварэнні ў рэгіёне інавацыйнага цэнтра бяспекі, які арыентаваны на павышэнне эфектыўнасці навучання дзяцей дзеянням у экстрэмальных і іншых надзвычайных сітуацыях. Да прыкладу, у адным памяшканні будзе імітацыя кар'ера, у іншым - вадаём, пакрыты лёдам, у трэцім - адкрыты вадаём, у чацвёртым - газавыя прыборы, у пятым - электрычныя прыборы, печкавае ацяпленне, далей - дарожныя знакі, святлафоры. Магчыма, яшчэ па ахове працы нейкія пытанні. Усюды інструктар будзе даводзіць пэўныя моманты, а на выхадзе - відэа, міні-тэсты або акцыя", - растлумачыў Аляксандр Сычоў.

Мяркуецца, што праз сістэму адукацыі навучэнцы і выхаванцы ўсіх устаноў рэгіёну групамі будуць наведваць дадзены цэнтр, дзе змогуць на практыцы адпрацаваць навучальны матэрыял па АБЖ. "Зараз мы самі ходзім у школы, праводзім нейкія прафілактычныя мерапрыемствы. Але таго ўзроўню, які павінен быць, пакуль няма. У Мінску ў гімназіях ёсць уласныя цэнтры бяспекі: вялікае памяшканне з інтэрактыўнай дошкай, камп'ютарамі, тэстамі. Гэта добры прыклад", - дадала начальнік аддзялення агітацыі і прапаганды ДАІ УУС аблвыканкама Алеся Сярэгіна.

Больш за палову абласцей рэспублікі такія цэнтры ўжо маюць. У Віцебску для размяшчэння аб'екта вызначана будынак аднаго з каледжаў. Распрацаваны агульны праект, змест асобных пакояў. Ужо адбылося некалькі пасяджэнняў рабочай групы, у дадзены момант вырашаецца пытанне з фінансаваннем будаўніцтва.

Круглы стол на тэму "Прафілактыка дзіцячага траўматызму ў Віцебскай вобласці" сабраў у Віцебскім абласным дзіцячым клінічным цэнтры (ВАДКЦ) спецыялістаў амаль усіх асноўных суб'ектаў, занятых у гэтай працы, - МНС, ДАІ, аховы здароўя. Аляксандр Сычоў у сваім выступленні акцэнтаваў увагу на крытэрыях ацэнкі сацыяльна небяспечнага становішча і выпадках, калі дзеці застаюцца без нагляду. Ён паведаміў, што ў вобласці мала рэгіёнаў, дзе адпрацаваны алгарытм узаемадзеяння пры выяўленні такіх фактаў. Калі, да прыкладу, паштальён, майстар водаканала, работнік ЖЭУ заходзіць у дом і бачыць, што дзеці адны, нікога з дарослых няма, далёка не кожны ведае, куды ў гэтай сітуацыі тэлефанаваць, каму паведамляць, або проста не хоча з гэтым звязвацца. Таму па-ранейшаму ўсё залежыць ад асабістай свядомасці бацькоў, - асабліва падкрэсліў прадстаўнік МНС.

Медыкі, абапіраючыся на статыстыку выпадкаў траўматызму, з якімі звяртаюцца да ўрачоў, пацвердзілі, што доля бытавога дзіцячага траўматызму - самая высокая. Напрыклад, са слоў загадчыцы дашкольна-школьнага аддзялення ВАДКЦ Людмілы Карловай, у Віцебску такія факты складаюць 78%. Затым ідуць выпадкі ў грамадскіх месцах, на вуліцы, падчас масавых мерапрыемстваў - 20%. І зусім няшмат - у дзіцячых садках і школах. Гэта значыць, што асноўную ўвагу трэба накіраваць на працу з бацькамі, якія павінны усведамляць сваю адказнасць, ведаць пра ўсе рызыкі для іх дзіцяці, старацца іх мінімізаваць, асабістым прыкладам дэманстраваць выкананне правілаў бяспекі.

Кацярына Князева, БЕЛТА.