Інтэлектуалы Віцебска далучыліся да праекта "Мазгабойня"

Інтэлектуалы Віцебска далучыліся да бясплатнага карпаратыўнага праекта "Мазгабойня" і сёння правядуць ужо другую сустрэчу, паведаміў карэспандэнту БЕЛТА арганізатар і вядучы праекта ў Віцебску Рынат Карымаў.

Праект "Мазгабойня" - гэта больш свабодная і расслабленая, чым спартыўны варыянт "Што? Дзе? Калі?", версія гульняў на логіку, кемлівасць і эрудыцыю. Каманды, аб'яднаныя агульнай працай ці хобі, сустракаюцца ўвечары за столікамі кафэ ці клуба і ў нязмушанай атмасферы гуляюць 7 тураў па сем пытанняў. Амаль паўсотні пытанняў складзены такім чынам, што мозг не разрываецца ад цяжкіх задач, а толькі падтрымліваецца ў тонусе.

"Усё пачалося ў Вільні, дзе і зарадзіліся падобныя пасядзелкі. Потым нашы мінскія сябры Аляксандр Ханін і Кацярына Максімава заразіліся ідэяй правесці "Мазгабойню" ў Мінску. За пару гадоў праект развіўся да такой ступені, што арганізатарам ужо складана пасадзіць каманды за гульнявыя сталы нават у самых вялікіх мінскіх клубах", - распавёў Рынат Карымаў.

Яму належыць ідэя прасоўвання праекта ў родным горадзе. Ініцыятыву падтрымалі мінскія арганізатары, якія таксама далі пакет пытанняў для сваіх сяброў у рэгіёне. І 9 кастрычніка гульня стартавала ў Віцебску. Горад над Дзвіной стаў другім у рэспубліцы пасля сталіцы, дзе мясцовыя інтэлектуалы могуць пасля працоўнага дня ці вучобы расслабіцца ў кампаніі аднадумцаў і сумясціць прыемнае з карысным.

Першая гульня, якая прайшла ў гарадскім антыкафэ, выклікала вялікі ажыятаж. Гулялі 10 каманд, але жадаючых было больш. Таму для другой сустрэчы арганізатары падыскалі памяшканне пабольш. Яны ўпэўнены, што моладзь горада па вартасці ацэніць новае забаўка і колькасць удзельнікаў будзе прырастаць з кожнай новай гульнёй.

Кацярына Князева