Інтэрнэт-крамы Беларусі з 1 ліпеня абавяжуць мець банкаўскія плацежныя тэрміналы

Як патлумачыла падчас анлайн-канферэнцыі намеснік міністра гандлю Ірына Наркевіч, павінны быць два ахоўныя механізмы для спажыўца: чэк, калі разлік наяўны, а калі безнаяўны – тэрмінал, у электронным кашальку след таксама застаецца. Але гэтым патрабаванні да аснашчэння аб'ектаў плацежнымі тэрміналамі не абмяжоўваюцца.

У прэс-цэнтры інспекцыі МПС па Віцебскай вобласці нагадалі, што тэрміналы ў абавязковым парадку павінны быць у павільёнах, кіёсках, санаторыях, дамах (базах) адпачынку, аздараўленчых цэнтрах (комплексах), у аўтамабілях-таксі, дыягнастычных станцыях, якія ажыццяўляюць тэхнічны агляд транспартных сродкаў, а таксама ў касах чыгуначных станцый пры абслугоўванні імі больш за 250 пасажыраў у суткі і наяўнасці ліній сувязі. Акрамя таго, усе гандлёвыя і аб'екты грамадскага харчавання, размешчаныя ў капітальных будынках, павінны прымаць да аплаты пластыкавыя карткі.

З 1 студзеня бягучага года падлягаюць аснашчэнню плацежнымі тэрміналамі аб'екты, у якіх па выніках 2013-га памер атрыманай выручкі склаў больш за 7500 базавых велічынь (БВ), па арганізацыях сістэмы спажывецкай кааперацыі – звыш 15 000 БВ, бытавога абслугоўвання насельніцтва – больш за 3750 БВ.

Для аб'ектаў з абавязковага пераліку, у якіх плацежныя тэрміналы не ўстаноўлены, незалежна ад памеру атрыманай выручкі прадугледжаны спецыяльныя тэрміны для іх аснашчэння: у гарадах абласнога падпарадкавання і Мінску – з 1 ліпеня 2015 года; гарадах раённага падпарадкавання – з 1 студзеня 2016-га; на ўсёй тэрыторыі Рэспублікі Беларусь – з 1 ліпеня 2017 года. Пры гэтым колькасць плацежных тэрміналаў у аб'екце павінна адпавядаць колькасці адзінак касавага абсталявання.

Такім чынам, з 1 ліпеня ўсе юрыдычныя асобы і індывідуальныя прадпрымальнікі абавязаны ўсталяваць плацежныя тэрміналы, якія забяспечваюць, у тым ліку, прыём да аплаты банкаўскіх плацежных картак міжнародных плацежных сістэм «Visa» і «MasterCard», унутранай плацежнай сістэмы «Белкарт», эмісію якіх ажыццяўляюць айчынныя банкі, у аб'ектах, размешчаных у гарадах абласнога падпарадкавання і Мінску.

Між тым Міністэрства гандлю 2 чэрвеня 2015 года звярнулася ў Савет Міністраў Рэспублікі Беларусь з ініцыятывай падаўжэння тэрміну абавязковай устаноўкі плацежных тэрміналаў у сталіцы і гарадах абласнога падпарадкавання да 1 студзеня 2016-га. У сувязі з тым, што Указам Прэзідэнта Рэспублікі Беларусь ад 30.03.2015 №143 падаўжэнне да 1 студзеня будучага года тэрмін рэалізацыі рэшткаў тавараў, унесеных індывідуальнымі прадпрымальнікамі – плацельшчыкамі адзінага падатку да 1 ліпеня 2014 года на тэрыторыю Беларусі з тэрыторыі дзяржаў – членаў Мытнага саюза без суправаджальных дакументаў, Міністэрства гандлю мяркуе магчымым падтрымаць суб'ектаў малога бізнесу і ў частцы падаўжэння тэрміну абавязковай устаноўкі плацежных тэрміналаў. Адпаведная ініцыятыва падтрымана таксама Нацыянальным банкам Рэспублікі Беларусь.

Алена Пятрова, "Віцебскія весці"