Вынікі праекта трансгранічнага супрацоўніцтва ў адукацыі "Земгале-Ноўка" абмяркуюць у Віцебскім раёне

Вынікі адукацыйнага праекта трансгранічнага супрацоўніцтва "Земгале-Ноўка" абмяркуюць прадстаўнікі Даўгаўпілскай школьнай управы і іх калегі з Віцебскага раёна падчас візіту латвійскіх гасцей у рэгіён. Больш падрабязна пра праграму іх знаходжання распавяла начальнік аддзела адукацыі, спорту і турызму Віцебскага райвыканкама Вольга Разанава.

Дэлегацыя Даўгаўпілскай краявой думы і школьнай управы ў складзе сямі чалавек з 13 па 16 кастрычніка наведае Беларусь з рабочым візітам.

Галоўная мэта - падвядзенне вынікаў рэалізацыі трохгадовага праекта трансгранічнага супрацоўніцтва "Пашырэнне патэнцыйных магчымасцей у сферы адукацыі шляхам стварэння двухбаковай сеткі супрацоўніцтва "Земгале-Ноўка". За гэты час за кошт еўрапейскага фінансавання ў сярэдняй школе аграгарадка Ноўка Віцебскага раёна з'явіўся сучасны планетарый, абсталяваны мультымедыйнай тэхнікай, а таксама камп'ютарны клас. А ў школе латвійскага Земгале адкрыўся клас трактарнай справы.

"На дадзены момант ідзе аўдыт усіх мерапрыемстваў праекта. І 16 кастрычніка ў Ноўкінскай сярэдняй школе адбудзецца круглы стол, на якім будуць агучаны прамежкавыя вынікі", - растлумачыла Вольга Разанава. Між тым, праграма візіту стартуе ўжо 13 кастрычніка з прыёму ў консульстве Латвійскай Рэспублікі ў Віцебску. Затым госці наведаюць Кіраўскую сярэднюю школу, дзе пазнаёмяцца з працай мясцовага салона-галерэі дэкаратыўна-прыкладного мастацтва "Арт-птушка Прыдзвіння", паспрабуюць свае сілы ў якой-небудзь рамястве на майстар-класах, завершыцца гэты дзень наведваннем унікальнага Заронаўскага гісторыка-краязнаўчага музея, які заняў першае месца ў сваёй намінацыі на нацыянальным конкурсе музеяў.

А 14 кастрычніка аб'яднаная дэлегацыя работнікаў сістэмы адукацыі Даўгаўпілскага і Віцебскага рэгіёнаў адправіцца ў Мінск, дзе запланаваны шэраг рабочых сустрэч, у тым ліку ў Міністэрстве адукацыі, і культурна-пазнавальная праграма. На наступны дзень госці працягнуць знаёмства са школьнымі праектамі Віцебскага раёна. "Мы хочам паказаць, што адкрыты для разнастайных ініцыятыў і ўзаемадзеяння. Уласна, з Даўгаўпілскай школьнай управай у нас даўняя гісторыя супрацоўніцтва, пачынаючы з падпісання пагаднення ў 1996 годзе. І паміж нашымі рэгіёнамі таксама дзейнічае пагадненне аб супрацоўніцтве ў розных сферах: гандлі, культуры, спорце. Ідзе пастаянны абмен дэлегацыямі. Што яшчэ трэба, каб развіваць партнёрскія адносіны. Гэта мы і хочам абмеркаваць са сваімі калегамі", - заключыла Вольга Разанава.

Кацярына Князева, БЕЛТА.