Падведзены вынікі праверкі подпісаў у падтрымку патэнцыйных кандыдатаў у прэзідэнты ў Віцебскай вобласці

10 лістапада, Віцебск /Сяргей Кочатоў - БЕЛТА/. Праверка дакладнасці подпісаў, сабраных у Віцебскай вобласці ў падтрымку вылучэння кандыдатаў у прэзідэнты ў Беларусі, праведзена ў строгай адпаведнасці з выбарчым кодэксам. Аб гэтым заявіў сёння на пасяджэнні абласной тэрытарыяльнай выбарчай камісіі Вячаслаў Крук,коўскі, перадае карэспандэнт БЕЛТА. Усе прадстаўленыя ў аблвыбаркам дакументы тэрытарыяльных камісій па выніках праверкі подпісаў у падпісных лістах адпавядаюць выбарчаму заканадаўству. Найбольшую колькасць подпісаў сабрана ў падтрымку вылучэння на пост Прэзідэнта дзеючага кіраўніка дзяржавы Аляксандра Лукашэнкі. Яго падтрымалі амаль 221 тыс. жыхароў вобласці. У падтрымку Рыгора Кастусёва прызнаны дакладнымі 13241 подпіс, Аляксея Міхалевіча - 13686, Уладзіміра Някляева - 30077, Яраслава Раманчука - 9995, Віталя Рымашэўскага - 11724, Андрэя Саннікава - 4547, Мікалая Статкевіча - 25740, Віктара Церашчанкі - 8134, Дзмітрыя Уса - 24615. Старшыня аблвыбаркама адзначыў, што ініцыятыўныя групы некаторых прэтэндэнтаў дапускалі сур'ёзныя промахі і значныя парушэнні дзеючага заканадаўства. Так, подпісы ў падтрымку Віктара Церашчанкі, сабраныя на тэрыторыі 12 раёнаў вобласці, не ўлічваліся, бо пры праверцы сумарная колькасць недакладных подпісаў у гэтых раёнах склала больш за 15% ад агульнай колькасці правераных подпісаў у падпісных лістах. Таксама не ўлічваліся подпісы, сабраныя ў шэрагу раёнаў, у падтрымку Рыгора Кастусёва, Аляксея Міхалевіча, Уладзіміра Някляева, Віталя Рымашэўскага, Дзмітрыя Уса. Па выніках пасяджэння аблвыбаркам даручыў тэрытарыяльным камісіям, дзе пры праверцы дакладнасці подпісаў устаноўлены значныя парушэнні заканадаўства, перадаць матэрыялы для праверкі ў органы пракуратуры. "Перш за ўсё, гаворка ідзе аб фактах фальсіфікацыі подпісаў, падману выбаршчыкаў", - падкрэсліў Вячаслаў Крук,коўскі. -0-