Падведзены вынікі сацыяльна-эканамічнага развіцця на пасяджэнні Пастаўскага райвыканкама

Вынікі сацыяльна-эканамічнага развіцця раёна за бягучы перыяд 2024 года і павышэнне эфектыўнасці работы арганізацый разглядаюць на пасяджэнні Пастаўскага райвыканкама, перадае карэспандэнт БЕЛТА.

У рабоце пасяджэння ўдзельнічаюць старшыня Палаты прадстаўнікоў Нацыянальнага сходу, дэпутат па Пастаўскай выбарчай акрузе №29 Ігар Сяргеенка, а таксама старшыня праўлення Нацбанка Павел Калаур.

Старшыня Пастаўскага райвыканкама Сяргей Чэпік, адкрываючы пасяджэнне, прывёў у прыклад некаторыя станоўчыя вынікі сацыяльна-эканамічнага развіцця і адразу звярнуў увагу на сферы, дзе патрабуюцца дапрацоўкі, заклікаў забяспечыць выкананне ўсіх даведзеных паказчыкаў. Вынікі работы па асобных напрамках, па яго словах, выклікаюць занепакоенасць. "Лічу, што кадравы патэнцыял і патэнцыял па сыравінных рэсурсах у нас дастаткова прыстойны", - заключыў ён, дадаўшы, што раёну ёсць да чаго імкнуцца.

"За студзень - сакавік 2024 года прамысловасць раёна спрацавала з чыстым прыбыткам у суме Br2,6 млн - рост у 9 разоў да ўзроўню студзеня - сакавіка 2023 года. Атрымана выручка ў суме Br71,5 млн - 115,9 % да студзеня - сакавіка 2023 года", - паведаміла намеснік старшыні райвыканкама Ірына Несцяронак.

Арганізацыі раёна павялічылі вытворчасць да студзеня - сакавіка мінулага года пліт паркетных, мэблі, піламатэрыялаў таўшчынёй больш за 6 мм, шчэпак, сыроў цвёрдых, вырабаў з ануч, валакна лёну непрадзенага. Актыўна асвойваюць тут новыя віды імпартазамяшчальнай прадукцыі. Паспяхова ў гэтым плане працуюць ААТ "Пастаўскі малочны завод" - сыры, і ЧПУП "Пастаўскі мэблевы цэнтр", які выпускае паркет, мэблю і дзверы ў асартыменце. Агульны аб'ём выпуску імпартазамяшчальнай прадукцыі склаў $11,7 млн.

Як чакаецца, за паўгоддзе прамысловыя арганізацыі раёна спрацуюць з ростам у адносінах да аналагічнага перыяду 2023-га.

У рамках даручэння кіраўніка дзяржавы "Адзін раён - адзін праект" у ААТ "Пастаўскі малочны завод" рэалізуецца інвестпраект па арганізацыі выпуску малочнай прадукцыі. Выконваецца ён у два этапы: закупка абсталявання

для вытворчасці тварагу (першая партыя тэхналагічнага абсталявання ўжо паступіла, поўную пастаўку чакаюць па выніках паўгоддзя), затым - абсталявання для разліву малака ў пластыкавую бутэльку. Па апошнім атрымана шэсць прапаноў, якія цяпер вывучаюць.

Акрамя мадэрнізацыі іншых вытворчасцей і тэхнічнага перааснашчэння, сярод задач на 2024-ы ў прамысловым комплексе раёна - пошук новых рынкаў збыту, як у суседняй Расіі, так і краінах далёкай дугі.