Яблычны флэшмоб, зялёныя сувеніры і тэматычнае вяселле. Як Яблычны Спас адзначылі ў Алашках

Па словах міністра культуры Рэспублікі Беларусь Барыса Святлова, «Яблычны Спас» у Алашках – вядомы брэнд краю, які з'яўляецца святам народнай творчасці. Кожны яго ўдзельнік – майстар сваёй справы, няхай гэта будуць народныя танцы, маляванкі, разьба па дрэве, выкананне песень і прыпевак. У цені старых паліц сікораўскага саду гучала музыка розных краін, паэтычнае слова, вітаў у паветры водар святочных страў з яблычнай начынкай, прадстаўленых на падворках сельсаветаў.

– Традыцыя святкавання Праабражэння Гасподняга на малой радзіме садавода-селекцыянера Івана Сікоры зарадзілася 21 год таму. Паступова культурна-масавае мерапрыемства, падчас якога адбываецца асвячэнне пладоў новага ўраджаю, пашырала межы, прыцягваючы ўвагу жыхароў не толькі суседніх раёнаў, абласцей, але і краін, – сказаў старшыня Шаркаўшчынскага райвыканкама Дзмітрый Ламако.

– Не раз хацеў асабіста пабываць на «Яблычным Спасе», – адзначыў Генеральны консул Рэспублікі Беларусь у Даўгаўпілсе Уладзімір Клімаў. – Сёння я змог убачыць усю гэту прыгажосць на свае вочы. Мне здаецца, у свята вялікая будучыня.

Усё паглядзець і паспрабаваць

Праграма «Яблычнага Спаса» была насычанай. Мясцовыя майстры дэманстравалі свае вырабы, дзяліліся сакрэтамі майстэрства. Можна было прыняць удзел у яблычным флэшмобе, скласці карціну з яблыкаў, набыць сувеніры з выявай зялёнага яблыка знакамітага гатунку «памяць сікоры», які даўно стаў сімвалам Шаркаўшчынскага раёна.

– Усе пляцоўкі і падворкі інтэрактыўныя, – падкрэсліла намеснік начальніка аддзела адукацыі, спорту і турызму Шаркаўшчынскага райвыканкама Наталля Арэшкава. – Гэта прыцягвае ўвагу наведвальнікаў. Калі яшчэ прадставіцца магчымасць навучыцца плясці з тоўстых нітак дыван, як рабілі нашы бабулі, ці пячы бліны на калодзе па прыкладзе таленавітых гаспадынь з народнага клуба нацыянальнай кухні «Груца»? Дарэчы, адным з першых спёк блін міністр культуры Барыс Святлоў.

Удалая ініцыятыва

У разгар урачыстасці адбылося падпісанне пагаднення ў рамках ініцыятывы «Мэры за эканамічны рост» конкурсу пілотных праектаў, абвешчанага Еўрапейскай камісіяй.

– Упэўнена, што падпісанне важнага дакумента прадстаўнікамі Шаркаўшчынскага, Полацкага, Мёрскага і Ушацкага раёнаў стане дадатковым стымулам для прагрэсіўных змен, пераўтварэнняў у эканоміцы гэтых рэгіёнаў, – сказала каардынатар праекта Наталля Ефрэменка. – Ініцыятыва, у якую ўцягнуты шэсць краін Усходняга партнёрства, накіравана на тое, каб прадстаўнікі мясцовай улады станавіліся генератарамі паскарэння эканамічнага росту і развіцця прадпрымальніцтва.

Шаркаўшчынскі райвыканкам выступае заяўнікам праекта «Мэры за эканамічны рост», які пераадолеў першы этап аднайменнага конкурсу пілотных праектаў. Партнёрамі з’яўляюцца Полацкі, Мёрскі, Ушацкі райвыканкамы, мясцовы фонд садзейнічання развіццю міжнароднага дыялогу і супрацоўніцтва «Інтэракцыя».

Сямейная традыцыя

Апошнія некалькі гадоў на свяце ў Алашках праходзіць урачыстая цырымонія шлюбу «Яблычная вяселле». Два гады таму тут давалі клятву вернасці адзін аднаму маладыя муж і жонка Арцём і Лале Тарасёнак.

– Родам я з суседняя вёскі, – расказала Лале. – Мясціны вельмі прыгожыя. Здаецца, вяселле было ўчора, а сёння на свята мы прыйшлі ўжо з сыночкам Цімурам.

Шмат гадоў запар на алашкаўскай зямлі праходзіць фінал раённага конкурсу «Гаспадар сяла», у якім бяруць удзел самыя актыўныя, працавітыя і творчыя сем'і. Сёлета за ганаровае званне змагалася больш за 80 сем'яў, 7 з якіх дайшлі да фіналу. Сярод тых, хто прадстаўляў працоўныя калектывы раёна, перамога дасталася Сяргею і Таццяне Ракітко і іх дзецям Дзянісу і Вераніцы.

Сярод сем'яў, якія пражываюць у сельскай мясцовасці, лідзіравалі Малаковы. Летась Іван, Дыяна, іх дзеці Мікіта, Сафія, Ганнушка і Насця сталі сярэбранымі прызёрамі абласнога этапу конкурсу.

Іван працуе механізатарам у ААТ «Жвіранка». Па выніках 2016-га ён стаў уладальнікам ганаровага звання «Чалавек года Шаркаўшчыны». Да конкурсу, па словах Дыяны, яны рыхтаваліся доўга і ў выніку заданні выканалі бліскуча, потым нават арганізавалі для гасцей майстар-клас па касавіцы.

– Добра, калі ў раёне ёсць свайго роду самабытнае свята, якое аб'ядноўвае людзей, натхняе іх на новыя творчыя ідэі і пры гэтым служыць захаванню старадаўніх традыцый, – падкрэсліў Барыс Святлоў. – Я вельмі ўражаны тым, што ўбачыў у Алашках. Гэта цікава гасцям, у тым ліку тым, хто прыехаў з-за мяжы.

Дыяна Берніковіч, фота аўтара. "Віцебскія весці".