«Юность» і «Гомель» сустрэнуцца ў мінскім Палацы спорту ў стартавым матчы чэмпіянату Беларусі па хакеі

31 жніўня, Мінск /Сяргей Вішнеўскі - БЕЛТА/. Дзве найлепшыя каманды беларускай экстралігі - сталічная "Юнацтва" і "Гомель" - правядуць 3 верасня стартавы паядынак 18-га адкрытага чэмпіянату Беларусі па хакеі на лёдзе мінскага Палаца спорту, паведамляе карэспандэнт БЕЛТА. Прычым уваход на матч, які пачнецца ў 18.30, будзе свабодным. Такое рашэнне было прынята, каб як мага большую колькасць балельшчыкаў змаглі ўбачыць сустрэчу залатога і сярэбранага прызёраў, бо трыбуны хатняй арэны "Юнацтва" ў сталічным парку Горкага ўмяшчаюць толькі 760 гледачоў, а цікавасць да першага паядынку фіналістаў мінулага чэмпіянату абяцае быць высокай. Як растлумачылі ў прэс-службе ФХРБ, адным з ініцыятараў правядзення матчу на лёдзе самай ёмістай крытай мінскай арэны стаў міністр спорту і турызму Беларусі Алег Качан. У экстралізе 18-га адкрытага чэмпіянату Беларусі па хакеі возьмуць удзел 14 каманд. Ад нашай краіны выступяць "Юнацтва" (Мінск), "Гомель", "Металург" (Жлобін), "Хімвалакно" (Магілёў), "Віцебск", "Керамін" (Мінск), "Нёман" (Гродна), "Хімік-СКА" (Наваполацк), "Шыннік" (Бабруйск), "Брэст" і "Шахцёр" (Салігорск). Латвію прадставяць "Металургс" (Ліепая) і "Дынама-Юніёрс" (Рыга), а Украіна дэлегуе кіеўскі "Сакол". 3 верасня адбудуцца яшчэ 5 паядынкаў першага тура: "Хімвалакно" - "Сакол", "Нёман" - "Металург", "Брэст" - "Шыннік", "Металургс" - "Керамін", "Дынама-Юніёрс" - "Шахцёр". Завершыцца стартавы тур 4 верасня матчам "Віцебск" - "Хімік-СКА".-0-