Маладыя ратавальнікі-пажарныя з Нямеччыны абменьваюцца досведам са сваімі аднагодкамі ў Віцебскай вобласці

З 9 па 15 кастрычніка група дзяцей у суправаджэнні дарослых членаў добраахвотнага пажарнага таварыства з Германіі наведвае розныя адукацыйныя і культурныя ўстановы рэгіёна. У Віцебскай вобласці гасцей асабліва цікавіць, як арганізавана праца ў профільных класах МНС (у сферы бяспекі жыццядзейнасці), напрыклад, яны ўжо наведалі Віцебскае кадэцкае вучылішча.

 

"Гэты азнаямленчы візіт арганізаваны па запрашэнні нашых юных ратавальнікаў-пажарных, якія сёлета летам пабывалі ў горадзе Мюнхехаген у палявым лагеры, дзе пасябравалі з нямецкімі рабятамі. Такія лагеры з удзелам школьнікаў з Віцебскай вобласці праходзяць на тэрыторыі Германіі рэгулярна. Справа ў тым, што наша абласное ўпраўленне МНС сябруе з калегамі з добраахвотнага пажарнага таварыства горада Нінбург, рэгулярна праходзяць узаемныя паездкі для абмену вопытам, а ў апошнія гады асаблівы акцэнт робіцца на далучэнні дзяцей да добраахвотнага пажарнага руху", - растлумачылі ў абласным упраўленні МНС.

Для гасцей падрыхтавана і займальная культурная праграма, у тым ліку некалькі экскурсій па Віцебску з наведваннем музеяў. Таксама разам з беларускімі сябрамі нямецкія рабяты хадзілі ў боўлінг і пабывалі на картынгу. Пазнаёміліся з Оршай, дзе акрамя ўсяго іншага наведалі іміджавы аб'ект МНС на базе дзіцячага гарадскога парка "Казкавая краіна". 12 кастрычніка госці правялі ў Полацку і Наваполацку, а 13 кастрычніка праз Гарадок вернуцца ў Віцебск. Гэты дзень будзе напоўнены пераважна спартыўнымі мерапрыемствамі. У завяршэнні гасцей чакае наведванне этнаграфічнага музея ў вёсцы Заронава Віцебскага раёна і гульня ў лазертаг у вяровачным гарадку.

Кацярына Князева - БЕЛТА.