Маладыя журналісты Медыалабараторыі Віцебскай вобласці сустрэліся са старшынёй дэпутацкага корпуса Віцебшчыны Дзмітрыем Дземідавым
– У Беларусі для кожнага чалавека створаны роўныя ўмовы для рэалізацыі яго патэнцыялу. У кожнага маладога чалавека ёсць таленты. Наколькі гэтыя таленты дадуць станоўчыя вынікі, залежыць ад працавітасці, мэтанакіраванасці, дзелавых якасцей саміх жа рабят, – падкрэсліў Дзмітрый Уладзіміравіч. – У Віцебскай вобласці пачынае актыўна развівацца Маладзёжны парламент дзяцей і навучэнскай моладзі, які мае дарадчы статус пры мясцовых Саветах дэпутатаў. Важна захоўваць пераемнасць пакаленняў, бо моладзі хутка давядзецца актыўна ўключацца ў стваральную дзейнасць, займаць у тым ліку кіруючыя пасады, вырашаць пытанні жыццезабеспячэння насельніцтва нашага рэгіёну.
Юныя журналісты прапанавалі інфармацыйную падтрымку асвятленню працы дэпутатаў, у тым ліку Маладзёжнага парламента, і вылучылі ініцыятыву ўвайсці ў склад маладзёжнай прэс-службы.
На пытанне ад школьнікаў, хто ці што ў большай меры паўплывалі на станаўленне Дзмітрыя Дземідава як асобы, лідара і прафесіянала, старшыня дэпутацкага корпуса Віцебшчыны назваў Прэзідэнта Беларусі Аляксандра Рыгоравіча Лукашэнку, старшыню Савета Рэспублікі Наталлю Іванаўну Качанаву, старшыню аблвыканкама Аляксандра Міхайлавіча Суббоціна, архіепіскапа Полацкага і Глыбокскага Феадосія, а таксама чытанне кніг.
Дзмітрый Дземідаў параіў рабятам, каб ісці на дзяржаўную працу, важна, па-першае, атрымаць глыбокія веды і вопыт, прафесію, актыўна ўдзельнічаць у грамадскай дзейнасці, а па-другое, шчыра верыць і прыкладаць усе намаганні і старанні ў справе, якую выконваеш.
У гэты дзень медыялабаранты таксама сустрэліся з начальнікам галоўнага ўпраўлення ідэалагічнай работы і па справах моладзі аблвыканкама Марынай Новіцкай, якая парэкамендавала маладым журналістам уважліва аналізаваць паступаючую інфармацыю, правяраць яе і даносіць праўдзівую навіну да аднагодкаў і, вядома ж, вучыцца прафесіі журналіста ў вопытных настаўнікаў, калег.
Запамінальным акордам мерапрыемства стала экскурсія па будынку аблвыканкама, дзе рабяты даведаліся пра кіраўнікоў аблвыканкама, ветэранаў працы, першых сакратароў Віцебскага абкама КПБ, выдатных асоб Віцебшчыны і гістарычныя вехі нашага рэгіёна.