Маладым палачанам уручаць пасведчанні раварыстаў
Праект "Бяспека дзеля жыцця!" рэалізуецца ў Полацкім раёне. Як паведамілі карэспандэнту БЕЛТА у Полацкім райвыканкаме, фінальным этапам праекта стане ўручэнне 1 чэрвеня юным палачанам пасведчанняў кіроўцаў ровараў.
Удзельнікамі праекта сталі навучэнцы ўстаноў агульнай сярэдняй адукацыі горада Полацка і Полацкага раёна ва ўзросце ад 14 да 18 гадоў, якія маюць ровары. Для атрымання пасведчання раварыстам неабходна было прайсці два этапы: навучальны і экзаменацыйны. Першы праходзіў з 12 па 24 мая. Ва ўстановах адукацыі былі створаны базы даных. Раварысты, якія трапілі туды, вывучылі правілы дарожнага руху і асновы бяспекі, а затым прынялі ўдзел у практычных занятках, асноўная мэта якіх заключаецца ў набыцці навыкаў язды на ровары з улікам дарожных знакаў. 26 і 27 мая прайшоў другі этап: навучэнцы здавалі экзамен па правілах дарожнага руху і асновах бяспекі раварыста.
1 чэрвеня на плошчы Свабоды Полацка ў рамках свята "Полацк - горад, дружалюбны дзецям" будзе працаваць пляцоўка "Бяспека дзеля жыцця!", на якой пройдуць паказальныя выступленні юных раварыстаў. А затым супрацоўнікі Дзяржаўтаінспекцыі выдадуць удзельнікам праекта, якія паспяхова здалі экзамены, спецыяльныя пасведчанні.
Асноўнымі мэтамі праекта "Бяспека дзеля жыцця!" з'яўляюцца прафілактыка дзіцячага дарожна-транспартнага траўматызму, выхаванне законапаслухмяных удзельнікаў дарожнага руху, прыцягненне да праблемы дзіцячага дарожна-транспартнага траўматызму ўвагі дзяржаўных і грамадскіх арганізацый, прапаганда здаровага ладу жыцця.
Арганізатарамі праекта выступілі аддзел адукацыі, спорту і турызму Полацкага райвыканкама і міжраённы аддзел ДАІ па абслугоўванні гарадоў Полацка, Наваполацка і Полацкага раёна УУС Віцебскага аблвыканкама.
Алена Ціханава