Да новага навучальнага года на ўмацаванне матэрыяльна-тэхнічнай базы адукацыі Віцебшчыны накіравана ўтрая больш сродкаў
Дзякуючы аптымізацыі адукацыйнай сеткі Віцебшчыны на ўмацаванне матэрыяльна-тэхнічнай базы ўстаноў адукацыі рэгіёна накіравана больш за 22 млн рублёў, што амаль у 3,5 раза больш, чым летась. Пра гэта паведаміў старшыня аблвыканкама Мікалай Шарстнёў у дзень адкрыцця абласной педагагічнай канферэнцыі ў Канцэртнай зале «Віцебск». Якія задачы трэба будзе вырашаць сістэме адукацыі Віцебшчыны ў гэтым навучальным годзе?
Грошы будуць
– Настройвайцеся на працу, – напуціў педагогаў у пачатку выступлення Мікалай Мікалаевіч. – Сістэма адукацыі вобласці працуе стабільна, але пытанні ёсць. Адно з самых актуальных, што абвастрылася ў апошнія гады з-за дэмаграфічнай сітуацыі, – аптымізацыя адукацыйнай сеткі. Колькасць малакамплектных школ планамерна скарачаецца, частка – рэарганізуецца. Працэс лагічны, бо за апошнія чатыры гады ў сельскай мясцовасці вучняў стала прыкладна на 2,5 тыс. менш. У гарадах, наадварот, колькасць дзяцей павялічылася на 5,5 тыс. Да 1 верасня на Віцебшчыне функцыянуюць 367 устаноў агульнай сярэдняй адукацыі, 545 – дашкольнай, 5 прафесійна-тэхнічных каледжаў, 9 прафесійных ліцэяў (прафесійна-тэхнічная адукацыя), 11 каледжаў (сярэдняя спецыяльная адукацыя).
– Некалькі гадоў таму мы дамовіліся з педагогамі, што будзем арганізавана праводзіць аптымізацыю школ і дзіцячых садкоў, дзе гэта жыццёва неабходна, – растлумачыў Мікалай Шарснёў. – Пры гэтым мы павінны ўлічыць кожнага вучня, чуць бацькоў, забяспечыць максімальна зручны і бяспечны падвоз школьнікаў. А ўсе зэканомленыя грошы трэба накіроўваць толькі на развіццё сістэмы адукацыі. Цяпер ужо бачны вынік.
Да гэтага навучальнага года закуплена 40 новых камп'ютарных класаў (у мінулым годзе — 6), 30 школьных аўтобусаў (у 2016-м — 20), і яшчэ будзе 19. За кошт аптымізацыі зэканомім 11 млн рублёў. Да наступнага года плануецца ў цэлым завяршыць гэты працэс і атрымаць эканомію яшчэ 23 млн. Для параўнання, прыкладна такія сродкі выдзяляюцца з бюджэту на ўсё сельскую гаспадарку Віцебшчыны.
Ідэальная школа
На думку старшыні аблвыканкама, школа павінна ацэньвацца не столькі па матэрыяльным напаўненні, колькі па выніку працы.
– Рабяты павінны выходзіць са школы максімальна падрыхтаванымі да жыцця, – падкрэсліў Мікалай Шарснёў. – Няважна, куды паступаюць — у ВНУ ці навучальную ўстанову прафесійна-тэхнічнай адукацыі, але ўсюды яны павінны быць запатрабаванымі і пісьменнымі спецыялістамі. Прычым трэба стварыць такія ўмовы ва ўстановах адукацыі, каб у вышэйшыя навучальныя ўстановы дзеці паступалі без дапамогі рэпетытараў. Патрэбны і сучасныя тэхналогіі – «электронная школа» і таму падобнае.
Абласная педагагічная канферэнцыя праходзіла пад дэвізам «Эфектыўнасць, сістэмнасць, прафесіяналізм – прыярытэты адукацыйнай палітыкі Віцебскай вобласці». Педагогам рэгіёна сапраўды ёсць чым ганарыцца. На заключным этапе рэспубліканскай алімпіяды па вучэбных прадметах заваявана 70 дыпломаў (як і ў мінулым годзе).
Нашы рабяты атрымалі сярэбраны медаль міжнароднай алімпіяды па інфарматыцы, бронзавыя медалі на міжнароднай геаграфічнай алімпіядзе школьнікаў краін балтыйскага рэгіёну і міжнароднай геаграфічнай алімпіядзе.
Палепшыліся вынікі па выніках конкурсу работ даследчага характару (канферэнцый) навучэнцаў па вучэбных прадметах – заваявана 14 дыпломаў супраць 11 летась. 100-бальныя вынікі на ЦТ атрымалі навучэнцы Віцебска, Глыбоцкага, Аршанскага, Докшыцкага, Лепельскага і Лёзненскага раёнаў. Выпускніца віцебскай гімназіі №4 атрымала адразу два найвышэйшыя вынікі па хіміі і біялогіі.
Разам з тым вобласць па-ранейшаму займае апошняе месца ў рэспубліцы па выніках ЦТ. Толькі па «Граведазнаўстве» выпускнікі ўстаноў адукацыі паказалі вынікі вышэй за сярэднерэспубліканскія.
– Неабходна прааналізаваць мэтазгоднасць функцыянавання некаторых гімназій вобласці, – паставіў задачу Мікалай Шарснёў. – Гімназія – гэта элітная ўстанова адукацыі. Але шэраг з іх шмат гадоў не даюць вынікаў – перш за ўсё пераможцаў рэспубліканскіх прадметных алімпіяд. Практычна адсутнічае конкурс пры паступленні ў пятыя класы ў Бешанковіцкай гімназіі-інтэрнаце, Браслаўскай і Пастаўскай гімназіях, гімназіі №1 Оршы і №6 Віцебска. У наступным годзе неабходна вырашыць пытанне аб статусе такіх устаноў адукацыі. Няма выніку – няма гімназіі.
Падчас канферэнцыі агучылі патрабаванні па стварэнні эфектыўнага ўнутранага кантролю якасці адукацыйнага працэсу, павышэнню эфектыўнасці метадычнай работы на ўзроўні рэгіёнаў і ўстаноў адукацыі.
– Спрос і адказнасць кожнага настаўніка-прадметніка, класнага кіраўніка, адміністрацыі ўстановы павінны быць індывідуальныя, – падкрэсліў старшыня аблвыканкама. – Кожны на сваім месцы павінен адказваць за сваю справу.
Сімбіёз з вытворчасцю
Шмат нараканняў у кіраўніцтва вобласці выклікае якасць падрыхтоўкі рабочых кадраў, якія часта далёкія ад жыцця рэальных вытворчасцей.
– Кіраўнікі прадпрыемстваў вельмі незадаволены выпускнікамі прафесійна-тэхнічных устаноў, – адзначыў Мікалай Шарснёў. – Цяпер, напрыклад, у сельскай гаспадарцы атрымліваюць шмат сучаснай імпартнай тэхнікі, а карыстацца ёю маладыя спецыялісты не ўмеюць. Перавучаем механізатараў, запрашаючы нямецкіх спецыялістаў. Вядома, установа адукацыі не можа набыць, напрыклад, кормаўборачны камбайн, але ж можна даць тэорыю, а практыку арганізаваць на моцным прадпрыемстве. Стварыць сімбіёз навучальнай установы і вытворчасці.
Мікалай Шарснёў паставіў задачу – не толькі палепшыць вучэбна-вытворчую базу прафесійных устаноў адукацыі, але і наладзіць мэтавую падрыхтоўку спецыялістаў пад канкрэтныя запыты прадпрыемстваў.
– Тады вытворчасць і адукацыя не будуць папракаць адзін аднаго, – упэўнены Мікалай Мікалаевіч. – Усе будуць зацікаўлены ў падрыхтоўцы высокакласнага, а галоўнае — запатрабаванага спецыяліста. Таксама варта арганізоўваць практыку навучэнцаў на найбольш паспяховых прадпрыемствах, дзе малады чалавек можа ўбачыць перспектыву росту.
На канферэнцыі не раз падкрэслівалася: рацыянальна арганізаваная сетка ўстаноў адукацыі – эфектыўны спосаб атрымання дзецьмі сапраўды якаснай адукацыі як у вёсцы, так і ў горадзе. Умовы для гэтага створаны. Засталося працаваць. У добры шлях, педагогі!
Аляксандр Кутынко. Фота Дзмітрыя ОСІПАВА і Антона Сцяпанішчава. "Віцебскія весці".