Да будаўніцтва кролікаводчага комплексу ў Віцебскай вобласці плануецца прыцягнуць сродкі Белінфонда

Віцебская вобласць плануе пабудаваць сучасны трусагадоўчы комплекс з прыцягненнем сродкаў Беларускага інавацыйнага фонду. Пра гэта паведаміў журналістам намеснік старшыні Віцебскага аблвыканкама Алег Мацкевіч, які прыняў удзел у міжнародным форуме "Інавацыйнае прадпрымальніцтва Віцебскай вобласці "Ад малога да вялікага".

Па словах намесніка старшыні аблвыканкама, праект ужо гатовы і зараз праходзіць экспертызу. "Усё ж такі мы будзем будаваць трусагадоўчы комплекс, плануем прыцягнуць на гэтыя мэты грошы інавацыйнага фонду. Займецца будаўніцтвам ТАА "Бешанковічы аграпрадукт" - малое прадпрыемства, якое перапрацоўвае алеістыя культуры лёну, рапсу і выпускае заменнік суцэльнага малака, - сказаў Алег Мацкевіч. - Просім кіраўніка дзяржавы, каб прадпрыемства стала рэзідэнтам СЭЗ і атрымала пэўныя льготы". Намеснік старшыні аблвыканкама падкрэсліў, што ў рэгіёне 30% ад агульнай колькасці прадпрыемстваў з'яўляюцца інавацыйна актыўнымі. "Гэта не дрэнны паказчык, але, вядома, хацелася б, каб іх было мінімум палова", - сказаў Алег Мацкевіч. І прывёў некалькі яркіх прыкладаў паспяховых інавацыйных прадпрыемстваў, напрыклад, "СІВітал", дзе ствараюцца сучасныя тэст-сістэмы на вызначэнне віруса, і прадпрыемства "Віцебскія пад'ёмнікі", якое выпускае тэхніку з унікальнымі характарыстыкамі.

"Там, дзе ёсць інавацыя, працуе эфект мультыплікатара - там ёсць экспарт, ёсць прыбытак, ёсць падаткі, працоўныя месцы, годная зарплата і ўзровень жыцця людзей", - рэзюмаваў суразмоўнік. Сёння на інавацыйным форуме ў Віцебску падпісана некалькі пагадненняў аб развіцці супрацоўніцтва. Падпісанты - прадстаўнікі Беларусі, Расіі, Польшчы і Кітая. У тым ліку падпісана пагадненне паміж установамі аховы здароўя Віцебскай вобласці і прадпрыемствам з Кітая (бакі маюць намер стварыць у Віцебску беларуска-кітайскі цэнтр традыцыйнай медыцыны і гімнастыкі), а таксама пагадненне аб супрацоўніцтве паміж кіраўнікамі ўстаноў адукацыі Віцебскай вобласці і кіраўніцтвам Комплексу сярэдніх спецыяльных навучальных устаноў горада Лодзь (Польшча).

У форуме ўзялі ўдзел прадстаўнікі малога, сярэдняга і буйнога бізнесу, выканаўчай і заканадаўчай улады Беларусі, інфраструктуры падтрымкі прадпрымальніцтва, аб'яднанняў прадпрымальнікаў, міжнародных арганізацый. 13 лістапада форум будзе працаваць у Воршы.

Алена Ціханава,БЕЛТА.