Якасць медыцынскага абслугоўвання насельніцтва Віцебскай вобласці абмеркавалі на прэзідыуме абласнога Савета дэпутатаў
– Кантроль за выкананнем распараджэння Прэзідэнтам быў ускладзены на розныя ведамствы, а таксама і на дэпутацкі корпус краіны ўсіх узроўняў, – сказаў, адкрываючы пасяджэнне, старшыня абласнога Савета дэпутатаў Дзмітрый Дзямідаў. – Мы павінны быць зацікаўлены ў тым, каб сістэма аховы здароўя ва ўсіх рэгіёнах працавала стабільна і эфектыўна. Бо гаворка ідзе пра здароўе нашага насельніцтва. Кіраўнік дзяржавы дакладна абазначыў, што якаснае медыцынскае абслугоўванне павінны атрымліваць у тым ліку і жыхары глыбінкі. Іх здароўе, іх жыццё – найважнейшая каштоўнасць для дзяржавы.
На працягу 2023 года органамі пракуратуры, дзяржаўнага кантролю, міжведамаснай рабочай групай, створанай па распараджэнні Прэзідэнта Беларусі, былі праведзены праверкі, у ходзе якіх выяўлены шэраг недахопаў у сферы аховы здароўя, у тым ліку па пытаннях кадравага забеспячэння, выканання санітарных нормаў і правілаў, медыцынскага абслугоўвання сельскага насельніцтва.
Члены прэзідыума заслухалі даклады начальніка галоўнага ўпраўлення па ахове здароўя аблвыканкама Міхаіла Вішнявецкага, суправаджальныя даклады галоўнага ўрача абласнога цэнтра гігіены, эпідэміялогіі і грамадскага здароўя Уладзіміра Сінкевіча, дырэктара Віцебскага дзяржаўнага медыцынскага каледжа Алены Арловай і галоўнага ўрача Браслаўскай ЦРБ Аляксандра Макарэвіча.
Пры разглядзе пытання была дадзена ацэнка дастатковасці прымаемых мер, іх эфектыўнасці і прааналізаваны дасягнуты вынік.
– Сітуацыя ў дадзенай сферы дзякуючы сумеснай працы сістэмы аховы здароўя і мясцовай улады змянілася да лепшага, – рэзюмаваў Дзмітрый Дзямідаў. – Яна кантраляваная і кіраваная. Але кропак для далейшага прыкладання намаганняў яшчэ нямала. Неабходна не толькі захаваць дасягнуты вынік, але і рухацца наперад.