Як Браслаў рыхтуецца да II Еўрапейскіх гульняў?
Браслаўшчына як памежны раён, дзе дзейнічае міжнародны пункт пропуску «Урбаны», таксама заклапочана тым, як стварыць максімальна камфортныя ўмовы для тых, хто паедзе на еўрапейскі турнір праз яе тэрыторыю. За 10 месяцаў да пачатку Гульняў па дарозе ад ПП да мяжы з Шаркаўшчынскім раёнам праехала карэспандэнт «ВВ».
Пункт пропуску «Урбаны» знаходзіцца на рэканструкцыі ўжо не адзін год. Як паведамляе Віцебская мытня, на пачатак работ яго прапускная здольнасць складала 270 транспартных сродкаў у суткі, у той час як фактычна транспартны паток мог дасягаць тысячы аўтамабіляў.
На дадзены момант на ПП вядуцца работы другога пускавога перыяду: будаўніцтва пляцоўкі для грузавога і легкавога транспарту, службова-вытворчага будынка з заламі афармлення, канала для пропуску негабарытных грузаў і інш. Праект новага аўтадарожнага пункта пропуску ўключае ў сябе поўны комплекс інфраструктуры, які адпавядае сучасным еўрапейскім патрабаванням, у тым ліку выкананы ў рамках Праграмы трансгранічнага супрацоўніцтва «Латвія — Літва — Беларусь». Па праекце міжнароднай тэхнічнай дапамогі «Мадэрнізацыя інфраструктуры пунктаў пропуску «Урбаны — Сілене» плануецца аснашчэнне ПП сучасным інспекцыйна-даглядным комплексам, а таксама рэканструкцыя дарогі паміж пунктамі пропуску.
Такім чынам, адзначаюць у мытні, рэканструкцыя дазволіць скараціць час, неабходны для правядзення працэдур мытнага і памежнага кантролю, і выведзе працэс мытнага афармлення ў пункце пропуску «Урбаны» на якасна новы ўзровень.
Ад брамы ПП пачалі і мы свой рух. Палатно дарогі, чысціня абочын, кантэйнерныя пляцоўкі заўваг не выклікалі. Аднак трохкіламетровая чарга сустрэчных велікагрузных машын ускладняла рух: на нашай паласе вымушаны размінацца транспарт, які рухаецца ў абодва бакі – ад мяжы і да яе.
Магчыма, гэтай праблемы не будзе, калі з'явіцца аператар электроннай чаргі. Як сказалі ў Браслаўскім райвыканкаме, рашэнне па ім будзе прынята праз месяц-два. І тады кіроўцы стануць чакаць сваёй чаргі на стаянках, якія павінны з'явіцца паблізу мяжы. А пакуль чарга фур заканчвалася за Урбанамі. Кіроўцы сумавалі каля машын.
У самой жа вёсцы жыццё кіпела. Жыхары Латвіі актыўна атоварываліся ў прыватнай краме, дзе асартымент тавараў быў шырокі – прадукты і прамысловыя тавары з улікам попыту ў суседнім дзяржаве. Кіпела праца і ў нядаўна выстаўленым на таргі будынку мясцовага клуба. З яго новым гаспадаром сустрэцца не ўдалося. Але мясцовыя жыхары расказалі, што тут будзе шматфункцыянальны комплекс для дальнабойшчыкаў: крама, кафэ, гасцініца, душэвыя, пральня. Насупраць вяліся земляныя работы: машыны перавозілі і рассыпалі грунт, каток ушчыльняў яго, побач ішла разгрузка бардзюрнага каменя. Прыгранічны населены пункт прыхарошваўся. Адкрылася прыгожая панарама на касцёл, які раней закрывалі гаспадарчыя пабудовы.
Уявіўшы сябе кіроўцамі, якія едуць здалёк, мы ўглядаліся ў знакі, якія інфармавалі, дзе можна заправіцца, паесці, паглядзець нешта цікавае. З наяўнасцю АЗС усё выдатна. Да выезду з Браслава на працягу прыблізна 10 км іх налічылі тры. Самай зручнай здалася найбліжэйшая ад мяжы запраўка «Татнафты» з крамай, невялікім кафэ і прасторнымі пляцоўкамі для адпачынку. Як паведаміла адна з работніц, тут рэалізуюць 60 т бензіну ў суткі. Запраўка працуе 24 гадзіны. А вось вальеры Нацыянальнага парка «Браслаўскія азёры», паварот на якія пачынаецца каля АЗС, госці наўрад ці наведаюць — указальнік на іх месцазнаходжанне адсутнічае.
Кругласутачна адпускаюць паліва і на двух іншых АЗС, размешчаных на ўездзе і выездзе з Браслава.
З пачастункам пакуль цяжэй. Поўнавартасны абед могуць прапанаваць толькі ў кафэ «Сузор'е» і рэстаране прыватнага гатэля. Але да наступнага года, магчыма, з'явіцца гаспадар у рэстарана і кафэ збанкрутаванага ў 2018-м
спажывецкага таварыства. Перакусіць, выпіць кубачак кавы турысты змогуць у «Кавярні» і кафэ на гарадскім пляжы, уздоўж якога ідзе міжнародная дарога ад мяжы на Мінск.
Пацікавіліся мы і наяўнасцю банкаматаў, абменнікаў валюты. З першымі ў гасцей праблем не ўзнікне. Яны ёсць на аўтастанцыі, ля гандлёвага цэнтра «Віталіч», філіяла «Беларусбанка», ДРБУ-142, у працоўны час выдачу і абмен грошай вядуць касы філіялаў «Беларусбанка» і «Белаграпрамбанка», а вось абмяняць валюту пасля 17.00 праблематычна.
— Не бяда, — запярэчылі госці з Літвы, — усе крамы і запраўкі прымаюць да аплаты міжнародныя карткі. Ну а для тых, хто хоча перастрахавацца, абменны пункт на мяжы працуе кругласутачна.
Не будзе складанасцей у гасцей і з пошукам пошты, музеяў. Ужо на ўездзе знакі паказваюць напрамак, дзе яны знаходзяцца.
Такі карціна сёння. У 2019 годзе Браслаў прымае «Дажынкі», а значыць, папрыгажэе яшчэ больш, з'явяцца новыя аб'екты інфраструктуры.