Як у Віцебску будуюць пуцеправод «Полацкі» і калі чакаць адкрыцця

Штодня на ўзвядзенні транспартнай развязкі з мостам праз чыгуначныя шляхі ў раёне Полацкага рынку працуюць каля 300 рабочых і 70 адзінак тэхнікі. Маштабная жалезабетонная канструкцыя ўражвае сваімі памерамі: ужо бачныя ўсе з'езды, набылі абрысы тратуары, трамвайныя шляхі і, вядома ж, шырокія палосы для транспарту. Кіраўнік праекта — начальнік аддзела тэхнічнага нагляду дзяржаўнага прадпрыемства «Упраўленне капітальнага будаўніцтва Віцебскага аблвыканкама» Міхаіл Казураў распавёў пра тэмп будаўніцтва.

На самім мосце рабочыя заняты ўкладкай сетак электразабеспячэння для трамваяў, пад рэйкамі ўжо ўстаноўлены маналітныя пліты. Убаку бачна новенькі будынак падстанцыі, ад якой будзе «сілкавацца» электратранспарт, там засталося толькі ўсталяваць абсталяванне.

Рабочыя не расстаюцца з тахеометрам — вымяраюць вышынныя адзнакі для асфальтабетоннага пакрыцця. Устаноўку ложаментаў пад трамвайныя рэйкі даводзіцца вывяраць да міліметра, бо на паваротах пры заездзе на мост з боку вуліцы Касманаўтаў унутраны рэйка павінен быць крыху ніжэйшы за знешні: гэта неабходна для барацьбы з цэнтрабежнай сілай, каб трамвай на хуткасці не перакуліўся.

- На мост трэба нанесці 4-5-сантыметровы выраўнавальны пласт бетону, затым пройдзе гідраізаляцыйны пласт, пасля — ахоўны, і толькі тады прыступім да ўкладкі двух слаёў асфальтабетоннага пакрыцця, — падзяліўся планамі Міхаіл Казураў. – Раней мы былі заняты ўстаноўкай бэлек, зараз прыступілі да масы « дробназаўважных» работ, таму ў непасвячоных можа ўзнікаць меркаванне, што тут засталося яшчэ няшмат да завяршэння, але гэта не так: задач яшчэ дастаткова.

Аманалічваннем бэлек на з'ездах з моста на вуліцу Лакаматыўную займаюцца работнікі Мінскага мастабудаўнічага ўпраўлення № 2.

- У нашай брыгадзе працуюць 30 чалавек, пастаўленыя задачы выконваем па графіку, бо самае галоўнае – пастаўка матэрыялаў – наладжана бесперабойна. Таксама нашы работнікі задзейнічаны ў абсталяванні тратуараў, - распавёў старшы прараб філіяла МСУ № 2 Раман Залуцкі.

Такія ж работы выконваюцца і на з'ездзе на вуліцу Ленінградскую – прама да Полацкага рынку. Тут працуюць прадстаўнікі Магілёўскага МСУ № 1.

Шмат спецыялістаў задзейнічана і на скрыжаванні вуліц Леанова і Цітова, дзе вядуцца пракладка газаправода па пастаяннай схеме, перакладка электрычных сетак, устаноўка вонкавага асвятлення, а таксама запланавана ўзвядзенне дзвюх трамвайных прыпынкаў з навесамі. З-за гэтага будаўнікі вымушана праклалі аб'язны шлях.

- Праца вядзецца як і раней – вахтавым метадам. У нас працуюць спецыялісты Віцебскага будаўнічага трэста № 9, мехкалоны № 43, Ціраспальскага ПМК, Віцебскага ДСК, УП «Віцебскгазбуд», - заўважае М. Казуроў.

Але ўсё ж чакаць уводу ў строй сучаснай транспартнай развязкі з мостам праз чыгуначныя шляхі ў раёне Полацкага рынку застаецца нядоўга, работы выкананы практычна на 70 працэнтаў. На асобных участках работнікі Зяленбуда ўжо прыступілі да падрыхтоўкі расліннага грунту для пасеву газонных траў, а на будучых аўтастаянках, разлічаных на 300 машынамесцаў, ужо ўкладваюцца ніжнія пласты асфальту.

"Віцьбічы".