Як у Віцебскай вобласці ідзе падрыхтоўка да новага навучальнага года і па якіх крытэрыях будуць прызначацца стыпендыі спартсменам
Старшыня абласнога Савета дэпутатаў Уладзімір Церанцьеў падкрэсліў, што гэтыя пытанні вынесены на абмеркаванне нездарма. 9 жніўня пройдуць прэзідэнцкія выбары. А калі ўлічыць, што з 750 выбарчых камісій, створаных у вобласці, большасць размешчаны ў школах, то падрыхтоўцы да новага навучальнага года трэба надаць асаблівы імпульс і да гэтага часу завяршыць усе будаўнічыя работы: адрамантаваць дахі, фасады, замяніць камунікацыйныя сеткі і вокны. І гэта з улікам прапрацоўкі ўсіх аспектаў, якія тычацца адпачынку дзяцей у школьных лагерах.
Начальнік галоўнага ўпраўлення па адукацыі аблвыканкама Дзмітрый Хома праінфармаваў, што калі раней на капітальны, бягучы рамонт і арганізацыю навучальнага працэсу выдзялялася 17, 27 і 9 млн руб. адпаведна, то цяпер на падрыхтоўку да новага навучальнага года фінансаванне знізілася ўдвая. Але, як кажуць, няма ліха без дабра. З-за каранавіруснай інфекцыі ў сакавіку – красавіку ўпала наведвальнасць дзяцей, менш былі і выдаткі на харчаванне. Так што зэканомленыя сродкі будуць перанакіраваны на рамонтныя работы, што часткова кампенсуе недастаткоўную суму. Усялякую падтрымку ўстановам адукацыі павінны аказаць і райвыканкамы, дапамагаць і садзейнічаць якаснаму рамонту і падрыхтоўцы аб'ектаў да новага навучальнага года, каб выключыць найменшыя недахопы, якія могуць адбіцца на здароўі дзяцей.
Не застануцца ўбаку ад важнай справы і дэпутаты ўсіх узроўняў, як падкрэсліла старшыня камісіі Галіна Жаланава. Ужо стала традыцыяй удзельнічаць у акцыі «Збяром дзяцей у школу», аказваць матэрыяльную дапамогу шматдзетным сем'ям, падтрымліваць тых бацькоў, якія падчас пандэміі пазбавіліся працы.
Даведка «ВВ». Да месцаў вучобы трэба будзе дастаўляць на 283 аўтобусах 9,7 тыс. вучняў. Школы вобласці папоўняць свае шэрагі 550 маладымі спецыялістамі.
Крытэр адзін – вынік
Што тычыцца пытання стыпендый, то ў нашай вобласці налічваецца 100 спартсменаў, якім аказваецца матэрыяльная падтрымка.
– Мы заўсёды аказвалі фінансавую дапамогу таленавітым спартсменам, вылучаючы на гэта немалыя сумы з бюджэту, – падкрэсліў Уладзімір Церанцьеў. – Трэба вызначыцца па крытэрыях, па якіх прызначаецца дапамога. Самы галоўны – гэта вынік на міжнародным, еўрапейскім, сусветным узроўнях, удзел у алімпіядах. Кіраўнік дзяржавы акцэнтаваў увагу на тым, што спачатку трэба паказаць вынік, а потым атрымліваць бонусы. З гэтага будзем зыходзіць і мы пры фінансавай падтрымцы лепшых спартсменаў.
Тэкст і фота Алены БАШУН, "Віцебскія весці".