Кераміку I-IV стагоддзяў знайшлі на месцы старажытнага гарадзішча пад Верхнядзвінскам
Студэнты-гісторыкі БДУ знайшлі на месцы
старажытнага гарадзішча пад Верхнядзвінскам артэфакты I-IV стагоддзяў, паведамілі
ў
прэс-службе Белдзяржуніверсітэта.
Археалагічныя раскопкі вядуцца на гарадзішчы ў
вёсцы Цасты Верхнядзвінскага раёна Віцебскай вобласці. У экспедыцыі прымаюць
удзел першакурснікі гістарычнага факультэта БДУ. Раскоп на плошчы 80 кв.м
дазволіў знайсці прадметы, якія адлюстроўваюць бытавую культуру плямён балтаў. Сярод
знаходак – рыбалоўныя крукі, нажы, шылы, сякеры, прасліца, прадметы ўзбраення.
Адкрыты таксама ўпрыгажэнні з жалеза і бронзы: бранзалеты, шпількі, гузікі,
бляшкі, пранізкі.
"Велізарная колькасць разнастайнай
керамікі. Яна ўся ляпная, але значна адрозніваецца паміж сабой. Частка посуду
адносіцца да дняпроўска-дзвінскай археалагічнай культуры і датуецца I-IV
стагоддзямі н.э. Ёсць у знойдзенай калекцыі і фрагменты позняй керамікі. Пакуль не
атрымалася ўсталяваць яе паходжанне і прыналежнасць да пэўнага насельніцтва", -
распавялі ў прэс-службе. Усяго падчас раскопак выяўлена ўжо каля 5 тыс.
артэфактаў. Экспедыцыя ў Цастах прадоўжыцца да 24 ліпеня. Кіруюць працай
першакурснікаў гістфака старшы навуковы супрацоўнік Інстытута гісторыі НАН
Беларусі, дацэнт кафедры археалогіі і спецыяльных гістарычных дысцыплін БДУ
Паліна Курловіч, выкладчык той жа кафедры Уладзімір Плавінскі і дацэнт кафедры
крыніцазнаўства ВНУ Вольга Ліпніцкая. Археолагі плануюць выявіць
печ-даменную, жыллёвыя і гаспадарчыя аб'екты. Канкрэтную перыядызацыю знойдзеных
артэфактаў дапамогуць усталяваць далейшыя навуковыя даследаванні. Як адзначылі ў
БДУ, гэта гарадзішча даследавалася ў пачатку 1980-х гадоў, з таго часу
археалагічныя раскопкі тут не праводзіліся.