КДК лічыць неефектыўнай працу па зборы адходаў у Віцебскай вобласці

Камітэт дзяржаўнага кантролю канстатуе неэфектыўную працу на ўсіх этапах збору адходаў у Віцебскай вобласці, паведамілі карэспандэнту БЕЛТА ў КДК вобласці.

КДК вобласці правёў маніторынг арганізацыі збору шклаадходаў, якія ўтвараюцца на прадпрыемствах і ў насельніцтва Віцебскай вобласці. У адпаведнасці з Дзяржаўнай праграмай нарыхтоўкі і перапрацоўкі другаснай сыравіны ў Рэспубліцы Беларусь на 2009-2015 гады рэгіёну ўстаноўлены аб'ёмы збору адходаў шкла на 2012 год - 13 тыс.т, на 2013 год - 18 тыс.т.

Па дадзеных КДК, заданне на 2012 год у цэлым па вобласці па нарыхтоўцы адходаў шкла было выканана ўсяго на 25,6%, у тым ліку з 21 раёна вобласці толькі 2 раёны выканалі заданне ў поўным аб'ёме.

Пры вывучэнні арганізацыі работы з адходамі на камунальным прадпрыемстве "Спецаўтабаза г.Віцебска" ўстаноўлена, што прадпрыемства вывозіць камунальныя адходы на палігон, дзе ажыццяўляе іх пахаванне. За 2012 год з амаль 250 тыс.т адходаў, якія паступілі на палігон, сартавана ўсяго 0,2%, і здадзена нарыхтоўчым арганізацыям і прадпрыемствам-перапрацоўшчыкам на суму Br578,9 млн., у тым ліку шкло – 8,7 т на Br1,4 млн. На думку спецыялістаў кантрольнага ведамства, гэта сведчыць аб вельмі нізкай ступені сартавання камунальных адходаў з улікам таго, што ў зонах забудовы дамамі з смеццеправодамі ажыццяўляецца змешаны збор бытавых адходаў. Не ўсе пляцоўкі для збору бытавых адходаў у зоне забудовы дамамі без смеццеправодаў абсталяваны кантэйнерамі для раздзельнага збору шкла. Напрыклад, у Кастрычніцкім раёне Віцебска толькі 17,4% пляцовак для збору смецця былі абсталяваны кантэйнерамі для збору шкла.

Маніторынг паказаў неэфектыўную арганізацыю работы на ўсіх этапах збору адходаў, у выніку чаго не забяспечана выкананне заданняў Дзяржаўнай праграмы. Як лічаць у КДК, сітуацыя, якая склалася, абумоўлена недахопам спецыяльнага абсталявання, тэхнікі і фінансавых сродкаў, нізкім узроўнем сартавання камунальных бытавых адходаў.