Кірыла-Мяфодзіеўскія моладзевыя чытанні пройдуць сёння ў Віцебску
Навукова-практычная канферэнцыя маладых даследчыкаў "Кірыла-Мяфодзіеўскія маладзёжныя чытанні", прымеркаваная да святкавання 1025-й гадавіны Хрышчэння Русі, пройдзе сёння ў Віцебску. Пра гэта карэспандэнту БЕЛТА паведаміў прэс-сакратар Віцебскай епархіі Беларускай праваслаўнай царквы протаіерэй Андрэй Смальскі.
"Праблемнае поле канферэнцыі дастаткова шырокае. Акрамя Хрышчэння Русі і розных аспектаў асветніцкай дзейнасці святых роўнаапостальных братоў Кірыла і Мяфодзія, закранаюцца тэмы святых і святынь хрысціянскага свету, ёсць навуковыя працы, прысвечаныя ролі хрысціянства ў лёсах славянскіх народаў", - адзначыў Андрэй Смальскі.
На канферэнцыі прагучыць каля 20 дакладаў. Даследчыцкія працы падрыхтаваны студэнтамі і маладымі вучонымі Віцебскай духоўнай семінарыі, ВДУ імя Машэрава і Віцебскага філіяла Міжнароднага ўніверсітэта "МІТСО". Актыўны ўдзел прымуць школьнікі. "Паводле палажэння ў канферэнцыі могуць удзельнічаць маладыя людзі да 33 гадоў. Ніжняга абмежавання ўзросту няма. Гэта зроблена для таго, каб прыцягнуць да чытанняў большую колькасць дзяцей і падлеткаў. Такія мерапрыемствы служаць у тым ліку і мэтам духоўна-маральнага выхавання падрастаючага пакалення. На канферэнцыі прагучыць 8 дакладаў школьнікаў, 2 з іх напісаны вучнямі пачатковых класаў. Самыя юныя ўдзельнікі чытанняў - трэцякласніцы з Бешанковіч. Дзяўчынкі падрыхтавалі даклад на тэму "Праваслаўныя храмы роднага краю", - распавёў протаіерэй.
Навукова-практычная канферэнцыя маладых даследчыкаў "Кірыла-Мяфодзіеўскія моладзевыя чытанні" пройдзе ў Віцебску ў рамках XI Велікоднага фестывалю, прысвечанага 1025-й гадавіне Хрышчэння Русі і 1025-й гадавіне пачатку асветніцкай дзейнасці святых роўнаапостальных братоў Кірыла і Мяфодзія.