Кітайскую мову і баявыя мастацтва выкладаюць у адной са школ Віцебска

Надзвычайны і Паўнамоцны Пасол Кітайскай Народнай Рэспублікі ў Беларусі Цуй Цымін наведаў сярэднюю школу №44 Віцебска. У гэтай установе адукацыі дзеці вывучаюць кітайскую мову. Па словах яе дырэктара Сяргея Піталенкі, з кожным годам яна цікавіць усё больш вучняў.

— Каля 30 чалавек вывучаюць кітайскую як асноўную замежную, яшчэ 70 ходзяць на факультатыў. Попыт на гэтае напрамку пастаянна расце. Вучням цікавая не толькі сама мова, але і культура дружалюбнай краіны, у прыватнасці, баявыя мастацтва, — паведаміў Сяргей Уладзіміравіч. — Нядаўна нашы ўшуісты адправіліся ў Паднябесную на спаборніцтвы, чакаем іх з узнагародамі.

Пасла сустрэлі хлебам-соллю, правялі невялікую экскурсію, паказалі высокапастаўленаму госцю канцэртныя нумары. Спадар Цымін прыехаў у Віцебск з жонкай і дачкой, якія таксама пераканаліся, што ў абласным цэнтры створаны ўсе ўмовы для паспяховых заняткаў замежнай мовай.

— Супрацоўніцтва паміж нашымі краінамі пашыраецца. У розных сферах мы — надзейныя і ўзаемавыгадныя партнёры, — сказаў Цуй Цымін. — Радуе, што ў Віцебску маладыя людзі імкнуцца вывучаць кітайскую мову. Мы гатовыя ў далейшым аказваць дапамогу сярэдняй школе №44, якая з'яўляецца звяном аднаго ланцуга ў партнёрскіх адносінах Беларусі і Кітая.

Эдуард Бакевіч, "Віцебскія весці"