Кітайскі Шышоў стаў горадам-пабрацімам Оршы

Вынікам дзелавой сустрэчы дэлегацыі Аршанскага раёна ў Кітайскай Народнай Рэспубліцы стала падпісанне пратакола аб намерах паміж рэгіёнам Віцебшчыны і горадам Шышоў па пытанні ўстанаўлення пабрацімскіх адносін.

Дакумент змацавалі подпісамі старшыня Аршанскага райвыканкама Мікалай Лісоўскі і мэр горада Шышоў Шы Бічэнь. Згодна з пратаколам, беларускі і кітайскі бакі маюць намер супрацоўнічаць у сферах міжурадавага і гуманітарнага абмену, гандлю, эканомікі і іншых галінах. А таксама падтрымліваць цесную сувязь і кантакты, абменьвацца інфармацыяй і вопытам па пытаннях, якія ўяўляюць узаемную цікавасць.

Як распавёў Мікалай Лісоўскі, першым крокам да наладжвання двухбаковага супрацоўніцтва стала дамоўленасць аб партнёрстве аршанскай і шышоўскай эксперыментальных школ. Абмеркавалі і пытанні пастаўкі прадукцыі Аршанскага мясакансервавага камбіната ў Шышоў. Таксама кіраўніцтва кітайскага горада выказала зацікаўленасць у прадукцыі Аршанскага льнакамбіната і малоеапрацоўчых прадпрыемстваў рэгіёну. 

Падчас знаходжання ў КНР аршанцы пазнаёміліся з працай прамысловых і харчовых прадпрыемстваў, пагутарылі з прадстаўнікамі бізнес-колаў, наведалі індустрыяльны парк, аб'екты аграрнага сектара эканомікі, культуры, адукацыі.

Вольга Лебедзева, «Віцебскія весці».