Колькасць выпадкаў цяжкага траўматызму на прадпрыемствах Віцебскай вобласці ў I квартале скарацілася на 15,4%

14 красавіка, Віцебск /Дзіяна Курыло - БЕЛТА/. Колькасць выпадкаў цяжкага траўматызму на прадпрыемствах Віцебскай вобласці ў першым квартале гэтага года ў параўнанні з аналагічным перыядам 2008 года скарацілася на 15,4%. Пра гэта паведаміў карэспандэнту БЕЛТА начальнік Віцебскага абласнога ўпраўлення Дэпартамента дзяржаўнай інспекцыі Міністэрства працы і сацыяльнай абароны Беларусі Васіль Булатаў. У студзені-сакавіку бягучага года на прадпрыемствах і ў арганізацыях рэгіёна загінулі 4 работніка і 22 атрымалі цяжкія траўмы. Колькасць смяротных выпадкаў на вытворчасці засталася на ранейшым узроўні. Найбольш траўманебяспечнымі застаюцца прадпрыемствы аграпрамысловага комплексу і камунальнай формы ўласнасці. Як паказвае аналіз матэрыялаў праведзеных спецыяльных расследаванняў за мінулы год і першы квартал 2009 года, а таксама папярэднія даныя па нерасследаваных няшчасных выпадках бягучага года, асноўнымі прычынамі гібелі работнікаў і атрымання цяжкіх траўм застаецца чалавечы фактар. Па даных абласнога ўпраўлення, больш за 45% трагедый адбываецца з-за парушэння пацярпелымі працоўнай і вытворчай дысцыпліны, незадавальняючага ўтрымання і недахопаў у арганізацыі працоўных месцаў. Па выніках праверак, праведзеных дзяржаўнымі інспектарамі працы ў студзені-сакавіку, за дапушчаныя парушэнні правілаў і норм па ахове працы і працоўнага заканадаўства да адміністрацыйнай адказнасці ў выглядзе штрафу прыцягнуты 159 службовых асоб і 130 наймальнікаў. Ім прад'яўлена штрафных санкцый на Br33,4 млн. і Br68,9 млн. адпаведна. Да дысцыплінарнай адказнасці прыцягнуты 102 службовыя асобы, якія дапусцілі парушэнні патрабаванняў правілаў і норм па ахове працы. Па выніках спецыяльных расследаванняў з дзвюма службовымі асобамі за аднаразовае грубае парушэнне правілаў аховы працы, якое пацягнула калецтва або смерць іншых работнікаў, і адным пацярпелым, які знаходзіўся на працоўным месцы на момант атрымання траўмы ў стане алкагольнага ап'янэння, скасаваны кантракты ў адпаведнасці з патрабаваннямі Дырэктывы №1. Як адзначыў Васіль Булатаў, у вобласці для прафілактыкі вытворчага траўматызму ў красавіку праходзяць масавыя праверкі стану аховы працы ў арганізацыях АПК, у маі такому ж кантролю будуць падвергнуты прадпрыемствы будаўнічай галіны.-0-