Калектыў музея-сядзібы Ільі Рэпіна «Здраўнёва» ўдастоены спецыяльнай узнагароды Саюзнай дзяржавы
Узнагароды атрымалі гендырэктар Нацыянальнага мастацкага музея Беларусі Уладзімір Пракапцоў, расійскі кампазітар, акцёр, спявак Глеб Матвейчук, народны артыст РСФСР Леў Лешчанка і, што асабліва для нас прыемна, калектыў супрацоўнікаў музея-сядзібы Ільі Рэпіна «Здраўнёва». Нястомнаму кіраўніку музея Аляксею Сухарукаву ўручыў дыплом Дзяржаўны сакратар Саюзнай дзяржавы Рыгор Рапота.
А крыху раней у гэты дзень у рамках Дня Саюзнай дзяржавы Рыгор Рапота наведаў музей-сядзібу Ільі Рэпіна «Здраўнёва». Сёлета адзначаецца 125 гадоў з часу набыцця мастаком гэтага маляўнічага месца пад Віцебскам, дзе ён правёў восем летніх сезонаў і напісаў серыю карцін, што сталі потым вядомымі, – «Беларус», «Восеньскі букет», на якім выяўлена дачка Вера, «Панна на шпацыры сярод статка кароў», «На паляванні» і іншыя.
Сёння высакаякасныя копіі гэтых і іншых работ, падораных Пастаянным камітэтам Саюзнай дзяржавы, упрыгожваюць былую майстэрню Ільі Рэпіна.
– Сядзіба – незвычайнае месца, яна прыцягвае людзей мастацтва і моладзь. Мы чацвёрты год прыязджаем сюды і бачым плён сумеснай працы. Мы пастараліся зрабіць так, каб тут з'явіліся копіі карцін Ільі Рэпіна, каб экспазіцыя была цікавая для людзей розных пакаленняў. Хтосьці, наведаўшы музей, адродзіць у памяці сваё знаёмства з творчасцю мастака, а для кагосьці першая сустрэча з яго работамі адбудзецца менавіта тут, у «Здраўнёве». Гэта не проста музей, гэта пазнавальны комплекс. Тут праводзяцца пленэры, розныя мерапрыемствы для дзяцей. Менавіта ў гэтым напрамку мы будзем працягваць працу, бо дзеці вельмі чулыя, калі да іх пачынанняў праяўляюць увагу, – адзначыў Рыгор Рапота.
І на гэты раз Дзяржаўны сакратар прыехаў не з пустымі рукамі – Рыгор Рапата перадаў музею-сядзібе копію напісанага Ільей Рэпіным партрэта Аляксандра Жыркевіча, які захоўваецца ў фондах Ульянаўскага музея. Пра героя карціны – таленавітага юрыста, паэта, празаіка, публіцыста, грамадскага дзеяча і калекцыянера, знаёмага з выдатнымі дзеячамі культуры і мастацтва свайго часу, можна даведацца на выставе, што разгарнулася ў гэтыя дні ў «Здраўнёва».
Аляксандра Жыркевіча аб’ядноўвае з Ільей Рэпіным больш за 20 гадоў блізкага сяброўства. Дарэчы, вясной мінулага года ў музей прыязджала ўнучка Аляксандра Жыркевіча – Наталля Жыркевіч – Падлеская і распавядала не толькі пра свайго знакамітага дзеда, але і пра прадзеда – Івана Сцяпанавіча Жыркевіча, які ў 1836 – 1838 гадах узначальваў Віцебскую губерню.
Рыгор Рапата, а таксама старшыня абласнога Савета дэпутатаў Уладзімір Церанцьеў усклалі кветкі да помніка мастака і прынялі ўдзел у «круглым стале» «Мастацкая і літаратурная спадчына будучым пакаленням».
Таццяна Пастэрнак, "Віцебскія весці". Фота аўтара і БелТА.