Калектыў Віцебскага цэнтра сучаснага мастацтва ўдастоены спецыяльнай прэміі Прэзідэнта Беларусі

Калектыў установы культуры "Музей "Віцебскі цэнтр сучаснага мастацтва" удастоены спецпрэміі Прэзідэнта Беларусі за стварэнне экспазіцыі Музея гісторыі Віцебскага народнага мастацкага вучылішча і правядзенне маштабных выставачных праектаў "Восіп Цадкін. Вяртанне", "Аляксандр Родчанка. Фотаздымак з "УХУТЭМАСа". Кіраўнік музея адзначыў, што спецпрэмія Прэзідэнта стала вынікам сумеснай працы ўладаў горада, супрацоўнікаў музея, мастацтвазнаўцаў розных краін. "Важна, што гэтыя выставы былі рэалізаваны сумесна з іншымі музеямі, міжнародным фотафестывалем у Віцебску "Фотакрок". Самае галоўнае, што наш музей прыцягвае вялікія праекты і многія з іх яшчэ наперадзе", - сказаў Андрэй Духоўнікаў.

Сёлета пройдзе святкаванне 100-гадовага юбілею мастацкага аб'яднання УНОВІС ("Заснавальнікі новага мастацтва"). У бліжэйшы час арганізуюць тэматычныя выставы, у тым ліку дзіцячых работ з розных краін, у лютым адбудзецца міжнародная канферэнцыя, на якой збяруцца лепшыя спецыялісты па тэме УНОВІС з усяго свету. Да юбілею аб'яднання Нацбанк плануе выпусціць памятную манету, а "Белпошта" - канверт.

Андрэй Духоўнікаў дадаў, што ў калектыва шмат ідэй на будучыню. Сярод прыярытэтных задач ён назваў стварэнне ў Віцебску пастаяннай экспазіцыі сучаснага мастацтва. "У нас у горадзе ёсць вельмі добрыя мастакі, але пакуль для пастаяннай выставы няма пляцоўкі. Гэту справу трэба прасоўваць, шанаваць сваё, каб праз сто гадоў не аказалася, што ў Беларусі няма работ таленавітых землякоў", - дадаў дырэктар.