Калектывы з васьмі краін збяруцца на свяце традыцыйнай культуры ў Браславе

20 мая, Віцебск /Вольга Багачова - БЕЛТА/. Міжнароднае свята традыцыйнай культуры "Браслаўскія зарніцы" пройдзе ў Браславе 28-30 мая, паведаміла карэспандэнту БЕЛТА начальнік аддзела культуры Браслаўскага райвыканкама Галіна Караткова. У мерапрыемстве возьмуць удзел творчыя калектывы Беларусі, Расіі, Эстоніі, Латвіі, Літвы, Украіны, Казахстана і Польшчы. Усяго чакаецца каля 500 чалавек. Сёлета любімае браслаўчанамі свята будзе прысвечана адразу тром знамянальным датам: 945-годдзю Браслава, 70-годдзю ўтварэння Браслаўскага раёна і 65-годдзю Вялікай Перамогі, таму яго праграма будзе вельмі насычанай, адзначыла Галіна Караткова. Адкрываюць яе 28 мая фіналы раённых конкурсаў "Міс Браслава-2010" і "Маладыя галасы", перамогу ў якіх будуць аспрэчваць 10 мясцовых прыгажунь і 18 юных талентаў. Увечары моладзь чакае дыскатэка. 29 мая пройдзе пад знакам горада. У гэты дзень у Браславе разгорнецца выстаўка-кірмаш майстроў народнай творчасці, намётавы гарадок шасці рыцарскіх клубаў з Віцебска, Полацка і Наваполацка, будуць працаваць фотавыстава "Мой любімы горад", гульнявыя і спартыўныя пляцоўкі, атракцыёны, а таксама адбудзецца тэатралізаванае прадстаўленне "Меч Брачыслава", прысвечанае заснаванню горада. Яго галоўнымі героямі стануць напышлівая прыгажуня Дрыва і князь Брас, ад імя якога адбылося назва горада. На свяце адважны і высакародны воін уручыць сімвалічны ключ ад горада яго цяперашняму кіраўніку - старшыні Браслаўскага райвыканкама Пятру Гішкелюку. Заключны дзень "Браслаўскіх зарніц" будзе прысвечаны выступленням галоўных удзельнікаў свята - 20 калектывам з васьмі краін. Сваю майстэрства яны прадэманструюць на вялікім гала-канцэрце, які адбудзецца пасля цырымоніі ўскладання кветак і вянкоў да помніка загінуўшым воінам і тэатралізаванага прадстаўлення "Браслаў - горад-сад". Акрамя таго, у гэты ж дзень журы назаве пераможцаў адкрытага конкурсу "Браслаўскі сувенір", на які прадстаўлена каля паўсотні работ ад майстроў народных рамёстваў і розных прадпрыемстваў Віцебскай вобласці. Арганізатарамі мерапрыемства выступаюць Браслаўскі райвыканкам, упраўленне культуры Віцебскага аблвыканкама.-0-