Каманды 16 галіновых прафсаюзаў Віцебшчыны спаборнічалі ў 11 відах спорту

Арганізатарамі спаборніцтваў выступілі Віцебскае абласное аб'яднанне прафсаюзаў, абласны спартыўны клуб Федэрацыі прафсаюзаў Беларусі і ўпраўленне спорту і турызму аблвыканкама. Спаборніцтвы праходзілі на стадыёне аграрнага каледжа Віцебскай акадэміі ветэрынарнай медыцыны і ў спорткомплексе Віцебскага кадэцкага вучылішча.

На ўрачыстым адкрыцці калону спартсменаў-аматараў узначалілі баксёр Віктар Зуеў, цяжкаатлеты Анастасія Міхаленка і Таццяна Стукалава – знакамітыя прадстаўнікі Віцебшчыны на Алімпійскіх гульнях розных гадоў. Вітаючы ўдзельнікаў спартакіяды, ганаровых гасцей і заўзятараў,старшыня Віцебскага абласнога аб'яднання прафсаюзаў Іван Вазьміцель адзначыў, што ў апошнія гады ідзе адчувальнае абнаўленне спартыўных аб'ектаў, будаўніцтва і рэканструкцыя прафсаюзных турыстычных баз. Гэта спрыяе змястоўнаму адпачынку, умацаванню здароўя людзей.Старшыня абласнога Савета дэпутатаў Уладзімір Церанцьеў ацаніў вялікую працу, якая праводзіцца самай магутнай грамадскай арганізацыяй – прафсаюзамі – па прапагандзе здаровага ладу жыцця.

Каманды 16 галіновых прафсаюзаў – каля 400 чалавек – памераліся сіламі ў 11 відах спорту, што на 4 больш за леташні. Свае дасягненні прадэманстравалі і навучэнцы 13 прафсаюзных спартыўных школ вобласці, дзе ў агульнай складанасці займаецца каля 5 тыс. дзяцей. Дарэчы, для падтрымкі юных спартсменаў, якія патыхаюць надзеі, галіновымі прафсаюзамі заснаваны 24 стыпендыі. Удзельніца Гульняў у Рыа-дэ-Жанейра па марафонскім бегу МарынаДаманцевіч (прафсаюзная спортшкола «Нафтан») – з ліку такіх стыпендыятаў.

Пераможцамі ў камандным заліку сталі работнiкi «Віцебскаблгаза» (як і на папярэдняй спартакіядзе), на 2-м і 3-м месцах – прадстаўнікі аховы здароўя і адукацыі адпаведна. Што тычыцца асобных відаў спорту, то ў мнагабор’і і перацягванні каната не было роўных медыкам, у міні-футболе – яго аматарам з мясцовай прамысловасці і камунальна-бытавых прадпрыемстваў, у кідках у баскетбольны кошык – банкаўскім работнiкам. Ім уручаны кубкі, медалі і дыпломы. Лепшыя атлеты выступяць на рэспубліканскай міжгаліновай спартакіядзе прафсаюзаў, якая плануецца ў верасні ў Магілёве. На папярэдняй зборная Віцебшчыны заняла 2-е месца.

Галіна Шпакоўская. Фота Антона Сцепанішчава. «Віцебскія весці».