Комплекс былога дзіцячага лагера ў Аршанскім раёне прададзены з аўкцыёну
Аб'ект у 2012 годзе быў перададзены дзяржаўнаму прадпрыемству "Гатэль-Орша" і выкарыстоўваўся да 2017 года як база адпачынку "Дзявіна". У яго склад уваходзяць 28 капітальных пабудоў, у тым ліку два спальныя корпусы, чатыры дамы для персаналу, клуб, баскетбольная пляцоўка, медпункт, сталовая, склады з прыбудовамі, дом вартаўніка, пост аховы, душавая, сушылка, туалет, воданапорная вежа, артсвідравіна, ачышчальныя збудаванні, а таксама сеткі (вадаправодная, каналізацыйная, цеплавая і электрычная). Пад базу адпачынку адведзены зямельны ўчастак агульнай плошчай 6 га, які прадастаўляецца новаму ўласніку ў арэнду на 20 гадоў.
Першыя таргі па дадзеным лоце прайшлі ў студзені бягучага года. Наступныя праводзіліся са зніжэннем цаны. Улічваючы адсутнасць жадаючых, райвыканкам прыняў рашэнне аб продажы базы адпачынку па адной базавай велічыні за кожны аб'ект (БВ у цяперашні час складае Br25,5). Такім чынам, кошт лота, які прапаноўваўся да продажу, склаў Br714. Жаданне набыць яго выявілі пяць прэтэндэнтаў. На саракавым кроку аўкцыёну база адпачынку была прададзена за Br52 тыс. прыватнаму гандлёваму прадпрыемству з Аршанскага раёна.
Аб планах выкарыстання аб'екта журналістам распавёў заснавальнік фірмы Сяргей Вайніловіч. "Плануем зрабіць тут базу адпачынку, магчыма, з кемпінгам. Усю інфраструктуру былога лагера захаваем. Больш за тое, трэба будзе выканаць значны аб'ём працы па яе рамонце і аднаўленні, што запатрабуе дадатковых фінансавых укладанняў. Таму ўжо думаем аб магчымасці прыцягнення іншых інвестараў для развіцця гэтага аб'екта", - падзяліўся новы ўласнік.
Усяго з пачатку года камітэтам "Віцебскаблмаёмасць" прададзена 76 аб'ектаў на суму больш Br2,5 млн, з іх 34 аб'екты былі прададзены за адну базавую велічыню.