Конкурсныя праграмы і праекты «Славянскага базару ў Віцебску» збяруць прадстаўнікоў 33 краін
Віцебск павінен уразіць гасцей «Славянскага базару», які, нягледзячы на аб'ектыўныя складанасці, не страціў статус міжнароднага фестывалю, адзначыў віцэ-прэм'ер Беларусі Ігар Петрышэнка на пасяджэнні аргкамітэта па падрыхтоўцы і правядзенні форуму.
Сёлета на флагштоках ля Летняга амфітэатра будуць узняты 33 сцягі краін-удзельніц «Славянскага базару», на дзесяць больш, чым летась.
– Мы другі год праводзім фестываль ва ўмовах пандэміі, бяспецы павінна быць нададзена асаблівая ўвага, – звярнуўся да мясцовых службаў віцэ-прэм'ер.
На парадку дня стаялі пытанні гатоўнасці Віцебска да маштабнага форуму, якія тычацца як інфраструктуры горада, так і творчага складніка. Па першым тлумачэнні даў старшыня Віцебскага гарвыканкама Мікалай Арлоў. Ён адзначыў, што ў план падрыхтоўкі да «Славянскага базару» ўключаны 77 аб'ектаў. Гэта рэканструкцыя вуліцы Гагарына, рамонт дарожнай сеткі, афарбоўка фасадаў, прывядзенне ў парадак фестывальных пляцовак, гасцінічнага комплексу, аб'ектаў грамадскага харчавання і г. д. У фестывальнай сталіцы будзе высаджана 900 тысяч кветак, але галоўнай кветкай будзе васілёк. Яго выява ўпрыгожыць дамы, грамадскі транспарт, білборды і пано, прадукцыю лёгкай і харчовай прамысловасці.
На цэнтральных вуліцах горада будуць устаноўлены гандлёвыя палаткі. Традыцыйна пройдуць выставы-продажы «Малы бізнес у фестывальным Віцебску», «Славянскі калейдаскоп».
Мэр таксама распавёў, як будзе арганізавана медыцынскае абслугоўванне – на амфітэатры будуць дзяжурыць брыгады хуткай дапамогі, медыцынскі пункт для артыстаў абсталююць побач з грымёрнымі.
Асаблівая ўвага падчас аргкамітэта была нададзена турыстычнаму абслугоўванню, у прыватнасці, стануць курсіраваць аўтобусы ў музей-сядзібу Ільі Рэпіна ў Здраўнёва, гасцям прапануюць пешыя прагулкі па старажытным Віцебску, па Шагалаўскіх мясцінах.
Дзень моладзі на фестывалі пройдзе пад дэвізам «Моладзь запальвае», расказаў першы сакратар абласной арганізацыі ГА «БРСМ» Уладзімір Бабічаў. Сёлета ў Віцебску збяруцца прадстаўнікі ўсіх маладзёжных рухаў Беларусі з розных рэгіёнаў краіны. Пройдуць розныя нацыянальныя конкурсы, шоу-праграмы, гульні і спартыўныя спаборніцтвы.
Галоўныя тэмы фестывалю, якія адзначаны чырвонай ніткай на канцэрце адкрыцця форуму мастацтваў, – Год народнага адзінства, 30-годдзе СНД і 30-годдзе «Славянскага базару», падкрэсліў міністр культуры Беларусі Анатоль Маркевіч. Аб творчым напаўненні праграм расказаў таксама генеральны дырэктар Цэнтра культуры «Віцебск», дырэктар форуму Глеб Лапіцкі.
– Кожны канцэрт – унікальны. Напрыклад, Нацыянальны акадэмічны канцэртны артыстычны аркестр пад кіраўніцтвам Міхаіла Фінберга выканае кампазіцыі ўсіх лаўрэатаў прэміі «Праз мастацтва – да міру і ўзаемаразумення». Каларытным будзе выступленне ансамбля «Кабардинка». Сваіх прыхільнікаў збяруць «Тэатральныя сустрэчы», «Лялечны квартал», абласная філармонія, музеі і выставачныя залы, – падкрэсліў Глеб Лапіцкі.
Міністр інфармацыі Беларусі Уладзімір Пярцоў праінфармаваў, як будзе весціся трансляцыя фестывальных мерапрыемстваў. Так, усе канцэрты пакажуць беларускія каналы, канцэрты адкрыцця і закрыцця можна будзе паглядзець на РТР, дамовы на трансляцыю ёсць з Казахстанам і Арменіяй. На акрэдытацыю на «Славянскі базар» ужо пададзена больш за 30 заявак розных сродкаў масавай інфармацыі.
Фота Дзмітрыя ОСІПАВА, "Віцебскія весці".