Канструктарскае бюро "Дысплей" пачало вырабляць ахоўныя экраны для медыкаў
На мінулым тыдні спецыялісты вырабілі некалькі прататыпаў. Іх аддалі на тэсціраванне віцебскім медыкам. Пасля заўваг медработнікаў канструкцыю дапрацавалі і пачалі вырабляць. "За дзень наша абсталяванне дазваляе вырабляць 150 шчыткоў. Матэрыялы ёсць, мы іх выкарыстоўваем у асноўнай вытворчасці. Але патрэба ў шчытках медустаноў расце, таму будзем яшчэ закупляць сыравіну", - адзначыў намеснік галоўнага інжынера прадпрыемства Сяргей Шчаглоў.
Цяпер у вытворчасці экранаў задзейнічаны два лазерныя станкі. Элементы мацавання зроблены з аргшкла, сам экран вырабляецца па тэхналогіі лазернай рэзкі. Прадпрыемства плануе падаваць дакументы на сертыфікацыю прадукцыі ў Мінздароўя. "Гэтае пытанне прапрацоўваем, каб як мага хутчэй яго вырашыць", - дадаў спецыяліст.
У Віцебску да распрацоўкі ахоўных шчыткоў прыступілі розныя кампаніі, у якіх ёсць лазерныя станкі, 3D-прынтэры. Прыватныя фірмы бясплатна развозяць гэтыя экраны па медустановах горада.
