Кансульскі аддзел пасольства Латвіі можа быць адкрыты ў Браславе

Консульскі аддзел пасольства Латвіі ў Беларусі можа быць адкрыты ў горадзе Браслаў Віцебскай вобласці. Адпаведнае пытанне ў цяперашні час прапрацоўваецца беларускім і латвійскім бакамі, паведаміў карэспандэнту БЕЛТА начальнік Дзяржаўнай памежнай аховы Латвіі Нармундс Гарбарс.

Чакаецца, што ў выпадку прыняцця адпаведнага рашэння гэта будзе спрыяць больш актыўнай рэалізацыі беларуска-латвійскага пагаднення аб спрошчаным парадку ўзаемных паездак жыхароў памежных тэрыторый. Як паведамлялася, аб планах па зняцці некаторых бюракратычных бар'ераў пры рэалізацыі дадзенага пагаднення было заяўлена па выніках мінулай у Віцебску сустрэчы міністраў замежных спраў Беларусі і Латвіі.

"Гэта пагадненне працуе толькі год, і ўжо сёння мы бачым, што ёсць магчымасць яго палепшыць і стварыць больш прымальныя ўмовы для грамадзян", - сказаў Нармундс Гарбарс.

У сваю чаргу старшыня Дзяржпагранкамітэта Беларусі Аляксандр Бойчка паведаміў БЕЛТА, што пытанні аб зняцці шэрагу бюракратычных перашкод будуць прапрацоўвацца на ўзроўні экспертаў. "У першую чаргу нязручнасць для беларускага боку заключаецца ў аддаленасці консульскай установы ў Віцебску. Безумоўна, для жыхароў Верхнядзвінскага і Браслаўскага раёнаў гэта стварае пэўныя нязручнасці. Менавіта гэтым мы тлумачым малую актыўнасць грамадзян Беларусі ў памежным руху, - сказаў ён. - У цэлым ёсць разуменне гэтага пытання. Думаю, што ў бліжэйшы час яно будзе прапрацавана і будзе прынята ўзаемапрымальнае рашэнне".