Новы арыгінальны праект прапанавала сваім наведвальнікам Мастацкая галерэя Нацыянальнага Полацкага гісторыка-культурнага музея-запаведніка.

Любы ахвотны можа напісаць копію карціны, якая спадабалася, са сталай экспазіцыі. Працаваць у залах галерэі з асабістым кансультантам-мастацтвазнаўцам прапануецца на працягу гадзіны. Важна не проста перамаляваць твор, а перадаць яго энергетыку і ўнутраны сэнс, паспрабаваць зразумець задум мастака.

– У нас сабрана калекцыя, якая распавядае пра развіццё выяўленчага мастацтва Беларусі пачынаючы з ХI стагоддзя. Кожны удзельнік праекта можа знайсці тое, што яму па душы, ­– адзначыла загадчыца галерэі Ларыса Лысенка.

Сваёй ініцыятывай музейшчыкі хочуць размаіціць формы працы і прыцягнуць у галерэю больш наведвальнікаў, а таксама раскрыць мастацкі патэнцыял жыхароў рэгіёна, даць ім магчымасць заявіць пра сябе.

Праект працягнецца да 30 снежня, а з лепшых «Шэдэўраў за гадзіну» будзе сфарміравана першая выстава 2017 года.

Ларыса Малашэня, "Віцебскія весці".