Круглы стол і падпісанне пагаднення: у Полацку праходзяць мерапрыемствы, прысвечаныя Міжнароднаму дню медыцынскай сястры

Сёння ў Полацку праходзяць мерапрыемствы, прысвечаныя Міжнароднаму дню медыцынскай сястры і прымеркаваныя да 80-годдзя вызвалення Беларусі ад нямецка-фашысцкіх захопнікаў. На іх запрошаны прадстаўнікі органаў улады, Полацкай епархіі, грамадскіх аб'яднанняў, медсёстры ўстаноў аховы здароўя. Ініцыятарам правядзення сустрэчы стала абласная арганізацыя Беларускага Чырвонага Крыжа. Такім чынам яна вырашыла аддаць даніну павагі работнікам сваёй медыка-сацыяльнай службы «Дапамога», якая сёлета адзначае 60-годдзе.

Праграма насычаная. У яе невыпадкова ўключана наведванне Музея-кватэры Героя Савецкага Саюза Зінаіды Тусналобывай-Марчанкі. У 1965 годзе наша праслаўленая зямлячка атрымала медаль Флорэнс Найтынгел — вышэйшую ўзнагароду, якую прысуджае медсёстрам Міжнародны Чырвоны Крыж за выключнае мужнасць і самаадданасць, праяўленыя ў мірны ці ваенны час.

У ходзе круглага стала, арганізаванага на базе Полацкага дзяржаўнага медыцынскага каледжа ім. Героя Савецкага Саюза З. Тусналобывай-Марчанкі, удзельнікі абмяняліся досведам работы па аказанні дапамогі розным групам насельніцтва, расказалі пра цяжкасці, з якімі даводзіцца сутыкацца, успомнілі гісторыю стварэння супольнасці сясцёр міласэрнасці на Віцебшчыне.

- Сённяшні круглы стол - гэта яшчэ адна магчымасць аддаць даніну павагі тым, хто змагаўся за наша з вамі светлае будучае і мірнае неба, коваў і дапамагаў коваць Перамогу: генералам і саллдатам, партызанам, работнікам тылу і, вядома, урачам і медыцынскім сёстрам, - адзначыў намеснік старшыні аблвыканкама Вячаслаў Дурноў. - Многія з іх удастоены баявых узнагарод, у тым ліку звання Героя Савецкага Саюза, 46 медсясцёр атрымалі спецыяльную ўзнагароду Міжнароднага Чырвонага Крыжа - медаль Флорэнс Найтынгел.

Работа медыцынскіх сясцёр і ў мірны час - гэта таксама подзвіг, толькі працоўны, падкрэсліў Вячаслаў Дурноў. Бо ў выніку людзі пазбаўляюцца ад пакутаў, да многіх вяртаюцца бадзёрасць і добрае самаадчуванне.

Важнай вехай у развіцці службы «Дапамога» абяцае стаць пагадненне паміж абласной арганізацыяй БТЧК і Полацкай епархіяй, падпісанне якога адбылося ў рамках круглага стала.

- Гэта вельмі знакавая падзея, - сказаў генеральны сакратар Беларускага Чырвонага Крыжа Дзмітрый Шаўцоў. - У нас ёсць чым дапамагчы адзін аднаму.

Ён растлумачыў, што Чырвоны Крыж займаецца падрыхтоўкай на бязвыплатнай аснове спецыялістаў, здольных аказваць першую дапамогу, ажыццяўляць догляд за цяжкімі хворымі.

- Мы гатовы навучаць гэтаму сясцёр міласэрнасці праваслаўнай царквы, - дадаў Дзмітрый Шаўцоў.

"ВІЦЕБСКІЯ ВЕСТКІ"