Культурнай сталіцай Беларусі-2010 названы Полацк

18 студзеня, Мінск /Жанна Котлярова - БЕЛТА/. Культурнай сталіцай Беларусі-2010 названы Полацк. Аб гэтым паведаміў карэспандэнту БЕЛТА начальнік упраўлення мастацтваў Міністэрства культуры Беларусі Міхаіл Казловіч.

Праект "Культурная сталіца Беларусі" ініцыявала Міністэрства культуры. Ён праводзіцца з мэтай падтрымання культурнага жыцця рэгіёнаў. На працягу года малыя гарады, названыя культурнай сталіцай, будуць станавіцца пляцоўкамі для канцэртных выступленняў лепшых калектываў, артыстаў, прадастаўляць залы для выстаў работ мастакоў. Такі праект дасць магчымасць жыхарам малых гарадоў далучыцца да культурных каштоўнасцей, лепшых узораў у беларускім мастацтве.

Як расказаў Міхаіл Казловіч, ад кожнай вобласці паступіла па адным прапанове па кандыдатах на званне першай культурнай сталіцы Беларусі. Нядзіўна, што менавіта Полацку выпала такое ганаровае права, бо гэты горад з'яўляецца адным з гісторыка-культурных цэнтраў Беларусі. У чацвер 21 студзеня будзе дадзены старт мерапрыемствам, падпісаны план правядзення іх на працягу года. І першай яскравай падзеяй стане выступленне ансамбля танца "Харошкі" і ансамбля "Класік-авангард". Сустрэча з гэтымі калектывамі чакае палачан.

На працягу года ў Полацку пройдуць выставы з фондаў Нацыянальнага гістарычнага музея Рэспублікі Беларусь, выстава работ беларускага мастака Івана Хруцкага, кніг Францыска Скарыны. У старажытным Полацку будуць гасцяваць і карціны майстроў пэндзля з Расіі, Літвы, Грэцыі, Германіі. Плануюцца канцэрты лепшых салістаў і калектываў Беларускай дзяржаўнай філармоніі. Нацыянальны акадэмічны Вялікі тэатр оперы і балета Беларусі летам запрасіць на сваё традыцыйнае мерапрыемства "Шэдэўры опернага мастацтва ля сцен старажытнай Сафіі". У маі плануецца адкрыццё ў Полацку помніка Героям вайны 1812 года, які аднаўляецца за кошт сродкаў Саюзнай дзяржавы.-0-