Латгальскія мастакі дадуць старт святкаванню 90-годдзя творчага аб'яднання "Уновіс" у Віцебску

26 студзеня, Віцебск /Дзіяна Курыла - БЕЛТА/. Латгальскія мастакі 27 студзеня адкрыюць у Віцебску чараду святочных мерапрыемстваў у гонар 90-годдзя творчага аб'яднання "УНОВІС" (цверджанне новага мастацтва), паведаміла сёння карэспандэнту БЕЛТА дырэктар музея "Віцебскі цэнтр сучаснага мастацтва" Валянціна Кірылава. Цверджальнікамі новага мастацтва сталі выкладчыкі і вучні Віцебскага народнага мастацкага вучылішча. Гісторыкам вядома дакладная дата стварэння гэтага аб'яднання наватараў - 14 лютага 1920 года. У склад "УНОВІС", які ўзначаліў Казімір Малевіч, уваходзілі І.Чашнік, В.Ермалаева, Е.Магарыл, М.Суецін, Л.Хідзекель - мастакі, чыя творчасць змяніла візуальнае ўспрыманне навакольнага асяроддзя і прызнана ва ўсім свеце. Філіялы "УНОВІС" былі створаны ў Маскве, Пермі, Саратаве, Смаленску. На працягу 1920-1924 гадоў Віцебскі камітэт "УНОВІС" з'яўляўся цэнтральным аб'яднаннем творчых сіл. Унікальная педагагічная сістэма адукацыі, распрацаваная мастакамі аб'яднання, выкарыстоўваецца дагэтуль. Па ёй будучых мастакоў навучаюць у Францыі, Германіі, Польшчы, Венгрыі. Віцебскі цэнтр сучаснага мастацтва мае намер увесь выставачны сезон 2010 года прысвяціць знамянальнай падзеі. Па дэвізам "90-годдзю "УНОВІС" прысвячаецца" пройдуць вернісажы як масцітых мастакоў - членаў Беларускага саюза мастакоў, майстроў пэндзля з Германіі і Латвіі, так і пачаткоўцаў аўтараў - студэнтаў і школьнікаў. Маштабным у гэтым годзе абяцае стаць традыцыйны дзіцячы праект "Перспектыва", які таксама будзе прысвечаны аб'яднанню авангардыстаў. Цэнтр сучаснага мастацтва правядзе навуковую канферэнцыю з удзелам даследчыкаў авангарда. Старт святкаванню 90-годдзя "УНОВІС" дадуць выкладчыкі і студэнты Латгальскага філіяла Латвійскай акадэміі мастацтваў г.Рэзекнэ, якія прадставяць у Віцебску свае працы. Як адзначыла Валянціна Кірылава, сучасная латгальская мастацкая школа працягвае лепшыя традыцыі авангарднага мастацтва. Гісторыка-культурная спадчына Віцебска цесна звязана з гісторыяй развіцця латгальскай школы, а імёны Гільберга, Клуцыса ўпісаны ў агульную культурную гісторыю, дадала суразмоўніца.-0-