Лепельскі ваенны санаторый мае намер атрымаць статус вышэйшай катэгорыі лячэбна-аздараўленчых устаноў
Канкурэнцыя сапраўды вельмі высокая. Сярод больш чым 110 аналагічных устаноў у Беларусі прыкладна 60 маюць такую ж кваліфікацыйную катэгорыю, як і здраўніца на Лепельшчыне, – першую. За дзесяць месяцаў бягучага года тут паправілі здароўе і выдатна адпачылі 6 694 чалавекі. З іх 264 дзіцяці-інваліда плюс столькі ж суправаджаючых дарослых. Ужо некалькі гадоў санаторый аказвае паслугі для гэтай катэгорыі грамадзян, а ў жылым корпусе №2 створаны спецыяльныя ўмовы для іх пражывання.
Але самым вялікім попытам цяпер карыстаўся санаторый у замежных грамадзян: тут пабывалі 4 279 чалавек з Расіі, Латвіі, Эстоніі, Азербайджана, Аўстрыі, Нідэрландаў, Казахстана, Германіі і іншых краін. Многія былі на Лепельшчыне ўжо не ў першы раз. А тыя, хто адкрыў для сябе дзіўны па прыгажосці запаведны край, выдатную здраўніцу, як правіла, маюць намер вярнуцца. Да прыкладу, дзяўчынка Оля, якую вы бачыце на здымку, з шматдзетнай сям'і, разам з татам і мама прыехала сюды з Арлоўскай вобласці Расійскай Федэрацыі. Дома з бабуляй засталіся яе старэйшыя сёстры.
– Але ў наступны раз мы абавязкова прыедзем усёй сваёй вялікай сям'ёй, – паабяцаў тата Олі. – Даведаліся пра гэты санаторый выпадкова – сябры расказалі. І мы так жа, як і яны, зачараваныя прыродай, задаволеныя клопатам, высокай якасцю медыцынскіх паслуг, прымальнымі цэнамі.
– Адміністрацыяй санаторыя прынята рашэнне пакінуць кошт пуцёвак практычна на ўзроўні мінулага года, – расказаў намеснік начальніка Лепельскага ваеннага санаторыя па медыцынскай частцы Сяргей Голубеў. – Гэта прынцыповая пазіцыя кіраўніцтва і калектыву: нягледзячы на ўсе цяжкасці і крызісныя з'явы, забяспечыць для сваіх пацыентаў два абавязковыя ўмовы – высокую якасць паслуг і прымальны кошт. Гэта дазваляе нам запаўняць
санаторый нават у міжсезонне, быць канкурэнтаздольнымі на рынку, працаваць, хоць і з мінімальнай, але рэнтабельнасцю.Нямалаважную ролю пры гэтым адыгрывае высокі прафесіяналізм супрацоўнікаў санаторыя. Ужо шмат гадоў яго ўзначальвае лекар у трэцім пакаленні, лаўрэат прэміі аблвыканкама «Чалавек года Віцебшчыны» Міхаіл Лях. На свайго кіраўніка раўняецца ўвесь калектыў. Звыш 50% урачэбна-сястрынскага персаналу маюць вышэйшую і першую кваліфікацыйную катэгорыі. Сёння яшчэ два ўрача абаранілі кваліфікацыю.
Кожны вузкі спецыяліст імкнецца ўкараніць нешта новае, што з'явілася ў галіне прадастаўлення санаторных, аздараўленчых, медыцынскіх паслуг, і палепшыць дапамогу пацыентам. Пачынаючы з урача-дыетолага, які сумесна з загадчыкам вытворчасці клапоціцца не толькі аб аспектах лячэбнага харчавання, але і пашырэнні ў меню нацыянальных страў.
– На працягу года практычна ўсе нашы доктары рыхтуюць навукова-практычныя працы, а па выніках дзеляцца ідэямі з калегамі, – падкрэслівае Сяргей Алегавіч. – Галоўнае, чаму ўдзяляецца ўвага, – гэта комплексны падыход да арганізацыі лячэння. Як правіла, у пацыентаў не адна хварэча – супутніх захворванняў дыягнастуем шмат. Вось і шукаем аптымальнае рашэнне, каб, па-першае, захаваць асноўны запавет лекара і не нашкодзіць, а па-другое, падабраць такі курс, каб ён не быў занадта інтэнсіўным, але прынёс найбольшы станоўчы тэрапеўтычны эфект усяму арганізму. Прасцей кажучы, калі чалавек, да прыкладу, пакутуе захворваннем апорна-рухальнага апарата, важна не толькі падлячыць суставы, але і падтрымаць сардэчна-сасудзістую сістэму і г. д. Дарэчы, нашымі доктарамі распрацавана і ўкаранёна нямала эфектыўных методык прымянення розных працэдур, якія раней нідзе не былі апісаны.
Для пацыентаў любога санаторыя важны, як умовы пражывання, так і арганізацыя вольнага баўлення часу, магчымасць для заняткаў фізкультурай і спортам. Гэтым пытанням у лепельскай установе надаецца самае пільную ўвагу. Сёлета асноўныя капітальныя ўкладанні былі накіраваны на паляпшэнне бытавых умоў і абнаўленне тэрыторыі здраўніцы.
Добраўпарадкаваны футбольнае поле, пляцоўка для гульні ў бадмінтон і тэніс, амаль кіламетр дарожак выкладзены бетоннай пліткай – тут імкнуцца па максімуму замяніць старое асфальтавае пакрыццё, добраўпарадкоўваецца зона прыбярэжнага адпачынку і аздараўлення. Пляж ваеннага санаторыя ўваходзіць у дзясятку лепшых у краіне. Усе інвестыцыі, накіраваныя на паляпшэнне матэрыяльнай базы, зароблены калектывам.
Вядома, павысіць якасць паслуг, пашырыць іх, дадаткова прыцягнуць пацыентаў дапамог бы басейн, пра будаўніцтва якога размова вядзецца ўжо шмат гадоў. Гатова і праектна-каштарысная дакументацыя. Але пакуль гэтая ідэя застаецца толькі марай – без дапамогі дзяржавы або заснавальніка (санаторый належыць Міністэрству абароны Рэспублікі Беларусь) уласнымі сіламі лепельчанам гэты праект не ажыццявіць.
Хоць чарговая планавая атэстацыя санаторыя была запланавана на 2018 год, яе вырашылі прайсці сёння і пацвердзілі высокі статус аздараўленча-лячэбнай установы. Гэта дазволіла паспяхова прыняць удзел у тэндэры, які праводзіў Рэспубліканскі цэнтр па аздараўленні і санатарна-курортным лячэнні, і выйграць па трох лотах. Акрамя гэтага, аддзел маркетынгу працуе з шэрагам турыстычных фірмаў, пастаяннымі партнёрамі, непасрэдна з кліентамі, дзякуючы чаму санаторый запоўнены нават у міжсезонне.
Алена Целятка, фота аўтара. «Віцебскія весці».