Лёзненскі райвыканкам аказвае неабходную дапамогу бацькам дзяцей, пацярпелых ад выбуху снарада

23 красавіка, Віцебск /Вольга Багачова - БЕЛТА/. Лёзненскі райвыканкам аказвае ўсю неабходную дапамогу бацькам дзяцей, пацярпелых ад выбуху снарада, паведаміў карэспандэнту БЕЛТА начальнік аддзела ідэалагічнай работы Лёзненскага райвыканкама Аляксандр Піута. Паводле яго слоў, мясцовыя органы ўлады ўзялі на сябе ўсе расходы па пахаванні загінулага 11-гадовага хлопчыка. Бацькам траіх пацярпелых дзяцей аказваецца псіхалагічная падтрымка, а таксама іншая неабходная дапамога. "У бліжэйшыя дні ў раёне пройдзе шырокае інфармаванне на тэму тэхнікі бяспекі і правілаў паводзін пры выяўленні небяспечных або якія выклікаюць занепакаенне прадметаў", - падкрэсліў суразмоўнік. Трагедыя адбылася напярэдадні каля 16.30 на ўскраіне вёскі Пнева. Як удакладніў карэспандэнту БЕЛТА пракурор Лёзненскага раёна Вячаслаў Котаў, хлопчык знайшоў снарад ВАВ і паспрабаваў яго разабраць, у выніку чаго той выбухнуў. Ад шматлікіх раненняў дзіця загінула на месцы. Мінна-выбуховыя траўмы і асколачныя раненні атрымалі яго 9-гадовая сястра, а таксама 6-гадовая дзяўчынка і 8-гадовы хлопчык, якія гулялі з загінулым. Першую неадкладную медыцынскую дапамогу ім аказалі ў Лёзненскай раённай бальніцы. Затым на рэанемабілі дзяцей перавезлі ў Віцебскую дзіцячую абласную клінічную бальніцу. Іх стан ацэньваецца як сярэдняй ступені цяжкасці, пагрозы для жыцця няма. Па факце выбуху раённая пракуратура праводзіць праверку. "Вынікі выбуха-тэхнічнай экспертызы пакажуць, якая менавіта выбуховае прыстасаванне стала прычынай гібелі і траўмавання дзяцей. Акрамя таго, прадстаіць дакладна ўстанавіць, калі і дзе загінулы хлопчык знайшоў снарад, хто наглядаў за дзецьмі на момант надзвычайнага здарэння", - дадаў Вячаслаў Котаў.-0-