Льнаводчая галіна патрабуе аб'яднання намаганняў беларускіх і расійскіх экспертаў - Мікалай Шэрснёў

Старшыня Віцебскага аблвыканкама Мікалай Шарснёў і дзяржаўны сакратар Саюзнай дзяржавы Рыгор Рапота абмеркавалі сёння ў Віцебску стан ільнаводчай галіны і неабходнасць аб'яднання намаганняў беларускіх і расійскіх экспертаў у гэтай сферы.

На перспектывах гэтай галіны завастрыў увагу Мікалай Шарснёў. Паводле яго слоў, у цяперашні час ва ўсім свеце адзначаецца трэнд на зялёную эканоміку і натуральныя тканіны. "З улікам захаванай тэхналагічнай і навуковай базы Беларусі і Расіі варта аб'яднаць намаганні ў гэтай сферы. Гэтая тэма нас хвалюе, мы бачым перспектывы і разумеем, што таксама многае ўпусцілі за апошнія гады, - падкрэсліў губернатар Віцебскай вобласці. - Разам з тым у Беларусі Віцебская вобласць узяла на сябе ношу аднавіць ільнозаводы, мадэрнізаваць іх абсталяванне. Мы высейваем цяпер асноўны аб'ём лёну ў краіне. Напэўна, пабудуем яшчэ адзін ільназавод. Гатовыя абмяркоўваць усе пытанні па гэтай тэме і нацэлены на вынік".

Рыгор Рапота нагадаў, што некалькі гадоў таму была падрыхтавана канцэпцыя сумеснай саюзнай праграмы па развіцці ільнаводства. Аднак пазней яна не была зацверджана міністэрствамі фінансаў дзвюх краін, бо насіла інвестыцыйны характар. "Мы можам укладваць грошы толькі ў інавацыйныя праекты", - растлумачыў Рыгор Рапота. У сувязі з гэтым дзяржсакратар Саюзнай дзяржавы падкрэсліў, што пры распрацоўцы новых сумесным праектаў у гэтай сферы варта адштурхоўвацца менавіта ад інавацыйнага складніка, што дазволіць пераадолець бар'ер, які перашкаджае адкрыццю фінансавання.

Сустрэча ў Віцебскім аблвыканкаме прайшла ў рамках мерапрыемстваў дня Саюзнай дзяржавы на XXIX Міжнародным фестывалі мастацтваў "Славянскі базар у Віцебску".