Лепшыя сацыяльныя работнікі Віцебскай вобласці да вясны атрымаюць скутэры
Лепшыя сацыяльныя работнікі тэрытарыяльных цэнтраў сацыяльнага абслугоўвання насельніцтва Віцебскай вобласці да вясны атрымаюць скутэры, паведаміла карэспандэнту БЕЛТА начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне аблвыканкама Вера Астапенка.
У кожным раёне будуць вызначаны лепшыя сацыяльныя работнікі на аснове конкурсаў прафесійнага майстэрства, пераможцы якіх атрымаюць у якасці прыза скутэр для абслугоўвання сваіх падапечных. Набыццё тэхнікі будзе ажыццяўляцца за кошт пазабюджэтных сродкаў, заробленых ТЦСАНАмі праз аказанне платных паслуг. "У дадзены момант у гарадах і райцэнтрах праходзяць выніковыя сходы, на якіх у тым ліку прымаецца рашэнне аб куплі скутэра. Раёны, у якіх сходы ўжо адбыліся, пацвердзілі сваю гатоўнасць зрабіць такое набыццё. А паколькі гэта прамое ўказанне абласнога камітэта, думаю, і астатнія не адмовяцца", - растлумачыла Вера Астапенка.
На яе думку, падобнае распараджэнне заробленымі сродкамі апраўдана. Па-першае, рэгіён нарошчвае аб'ёмы і спектр шторазова аказваемых сацыяльных паслуг насельніцтву. У 2014 годзе іх было аказана амаль 203 тыс., што на 8,2 тыс. больш, чым у 2013-м. У выніку тэрытарыяльныя цэнтры зарабілі Br26,5 млрд - рост склаў 59,6%. І лагічна накіраваць гэтыя грошы на ўмацаванне матэрыяльна-тэхнічнай базы саміх цэнтраў. А па-другое, Віцебская вобласць, асабліва некаторыя яе раёны, адрозніваецца вялікай аддаленасцю малых населеных пунктаў. Скутэр жа зробіць сацыяльнага работніка, у зоне абслугоўвання якога раскіданыя на вялікія адлегласці вёскі, больш мабільным.
Такі эксперымент ужо быў праведзены ў Пастаўскім раёне. Там вясной 2014 года пяць сацыяльных работнікаў пераселі з ровараў на скутэры. Пасля першых жа дзён жанчыны адзначылі, што новы від транспарту значна зручнейшы: дабіраешся да кліентаў хутчэй, ёсць магчымасць больш часу надаць зносінам з пажылымі адзінокімі людзьмі.
Кацярына Князева