Найлепшымі спартсменамі 2018 года ў Беларусі прызнаны Ганна Гуськова і Уладзіслаў Ганчароў

Фрыстайлістка ў лютым бягучага года парадавала айчынных заўзятараў перамогай на зімовых Гульнях, адсвяткаваўшы найбольш значны поспех у кар'еры. Уладзіслаў Ганчароў у скачках на батуце ў ходзе сезона прадэманстраваў стабільнасць выступлення на міжнароднай арэне на этапах Кубка свету ў індывідуальных скачках, а ў сінхронных разам з Алегам Рябцавым яны выйгралі чэмпіянаты свету і Еўропы, Кубак свету.

У дзясятку найлепшых спартсменаў 2018 года, на думку СМІ, таксама ўвайшлі Дар'я Домрачава (біятлон), Анастасія Пракапенка (сучаснае пяціборства), Арына Сабаленка (тэніс), Вольга Мазуронак (легкая атлетыка), Эльвіра Герман (легкая атлетыка), Надзея Скардзіна (біятлон), Максім Недасекаў (легкая атлетыка), Аляксандра Сасновіч (тэніс). Адзначым, у топ-10 апынуліся адразу тры прадстаўнікі "каралевы спорту".

Найлепшай камандай у гульнявых відах спорту па выніках 2018-га прызнана валейбольная "Мінчанка", якая дамаглася высокага выніку на міжнароднай арэне, заняўшы другое месца ў Кубку Еўрапейскай канфедэрацыі валейбола.

Сярод негульнявых відаў найлепшай камандай прагназуема прызнаны біятлонны жаночы квартэт - Надзея Скардзіна, Дзінара Алімбекава, Ірына Крыўко і Дар'я Домрачава, які зрабіў адну з галоўных сенсацый Алімпійскіх гульняў у Пхёнчхане, заваяваўшы залаты медаль.

Сярод 100 апытаных журналістаў першае месца страляючым лыжніцам аддаў 91 прадстаўнік СМІ. Найлепшым трэнерам года прызнаны Мікалай Козека (фрыстайл), у тройцы найлепшых настаўнікаў Віктар Ганчароў (валейбол, "Мінчанка") і Віктар Ганчарэнка (футбол, маскоўскі ЦСКА). Конкурс па вызначэнні найлепшых атлетаў года газета "Спартыўная панорама" праводзіла ў 60-ы раз у сваёй гісторыі.

Фота газеты "Спартыўная панарама".