Найлепшых Дзядоў Марозаў і Снягурак выбралі на Віцебшчыне

Абласны этап агляду-конкурсу «Елка-фэст-2014» стаў своеасаблівай рэпетыцыяй самых любімых дарослымі і дзецьмі навагодніх святаў. З уласцівай ім непасрэднасцю хлапчукі і дзяўчаты сачылі за Дзедамі Марозамі і Снягуркамі, якія з'ехаліся з усёй вобласці змагацца за званне лепшага. Пакуль канкурсанты рыхтаваліся да выступленняў, адны дзеці спяшаліся паведаміць галоўнаму зімоваму чараўніку аб сваіх дасягненнях і прыкладных паводзінах, іншыя распавядалі аб пажаданнях адносна падарункаў пад ёлачку: скейтборда, лыж і канькоў, а хтосьці проста прасіў шчасця і здароўя для ўсіх. Ізабіліе Дзедаў Марозаў і іх унучак нічым не здзіўляла маленькіх гасцей, хутчэй, нават цешыла, бо ўсе яны самыя сапраўдныя, і да таго ж з мяшком падарункаў. Дзеці цёпла і з шчырым захапленнем сустракалі кожнага выступаючага. Нялёгкая місія выбраць ідэальнага персанажа, які будзе прадстаўляць Віцебшчыну на рэспубліканскім конкурсе, легла на плечы дарослага журы. Яго старшынёй быў галоўны рэжысёр Цэнтра культуры «Віцебск» Аляксей Вашчанок. Ён сам больш за 23 гады выступае ў ролі зімовага чараўніка і па ўласным вопыце ведае, што навагоднія святы – сур'ёзная справа. Дзед Мароз у першую чаргу псіхолаг, бо наколькі ён зможа адчуць аўдыторыю, позяліць з ёй радасны настрой, настолькі ён запомніцца і дзецям, і дарослым.

Журы старанна ацэньвала ўсё: ад касцюма, манеры трымацца на сцэне, умення знаходзіць кантакт з партнёрам і публікай да зместу забаўляльнай праграмы і ўражання, якое засталося ў гледачоў пасля нумара. Напрыклад, полацкія Дзед Мароз і Снягурка са СШ №16 Віталій Хаданёнак і Надзея Татун зрабілі стаўку на сучасныя тэхналогіі: прасунуты дзед размаўляў па скайпе, запампоўваў музыку на флешку, і ўсё гэта, не здымаючы ролікавыя канькі. Нетрадыцыйны падыход прынёс ім першае месца ў намінацыі «Лепшая сюжэтна-ролевая праграма». Запомніўся гледачам і суддзям таксама маляўнічы выступ у нацыянальным стылі Максіма Мішурнага і Надзеі Краснаўскай (Палац творчасці дзяцей і моладзі Віцебска). Аляксандр Ціханенка і Вікторыя Шумко з абласнога Палаца дзяцей і моладзі актыўна працавалі з публікай. Журы ацаніла іх прафесіяналізм і артыстызм, за што яны атрымалі званне лепшых Дзеда Мароза і Снягуркі 2014 года. Цяпер ім трэба прадставіць наш рэгіён на рэспубліканскім «Елка-фэст» 12 снежня ў Мінску. Казачны дуэт Аляксандра Латышава і Таццяны Гецман з Цэнтра творчасці дзяцей і моладзі Кастрычніцкага раёна Віцебска прызавыя месцы атрымаў адразу ў дзвюх намінацыях. Снягурка з Мазолаўскай СШ Віцебскага раёна Людміла Шлык заваявала спецыяльную ўзнагароду за выканальніцкае майстэрства.

Наталля Камлёва, "Віцебскія весці"