Лепшых маладых памочнікаў міліцыі ўшанавалі ва УУС Віцебскага аблвыканкама

— На пачатку лютага ў нашай краіне адзначаецца Дзень моладзевых атрадаў аховы правапарадку, — расказала загадчыца аддзела арганізацыйнай і праграмнай дзейнасці абкама БРСМ Таццяна Рык. — У вобласці дзейнічаюць каля 120 падобных фарміраванняў, якія аб'ядноўваюць звыш 2 тыс. рабят, і іх колькасць з кожным годам расце.

Члены МОАП сумесна з супрацоўнікамі органаў унутраных спраў патрулююць вуліцы населеных пунктаў, месцы адпачынку і масавага збору людзей. Акрамя таго, дружыннікі сочаць за парадкам на дыскатэках, у інтэрнатах і г. д.

Удзел грамадзян у ахове правапарадку прадугледжаны заканадаўствам Беларусі, але далёка не кожны пагодзіцца займацца такой адказнай і часам небяспечнай справай. А тыя, хто ўсё ж такі вырашыўся, рэгулярна павышаюць узровень тэарэтычнай і фізічнай падрыхтоўкі, каб адпавядаць высокім патрабаванням, што прад'яўляюцца да МОАПаўцаў. Да прыкладу, у палку патрульна-паставой службы міліцыі УУС

аблвыканкама для добраахвотнікаў рэгулярна праводзіцца спецыялізаванае навучанне.

— Члены гэтых атрадаў — нашы незаменныя памочнікі, таму працы з імі мы надаём велізарную ўвагу, — удакладніў першы намеснік камандзіра ПППСМ Андрэй Міхайлаў. — Па-першае, яны павялічваюць колькасць міліцэйскіх нарадаў у горадзе і выступаюць у якасці сведак або панятых у выпадку неабходнасці. Па-другое, аказваюць станоўчы ўплыў на сваіх аднагодкаў, з'яўляючыся для іх прыкладам гонару і мужнасці.

Толькі за два апошнія месяцы дружыннікі дапамаглі міліцыянерам Віцебшчыны выявіць больш за 270 правапарушэнняў. Акрамя таго, добраахвотныя дружыны — выдатная кузня кадраў для праваахоўных органаў. У гэтым навучальным годзе ім было выдадзена 55 рэкамендацый для паступлення ва ўстановы адукацыі МУС.

На ўрачыстым сходзе, прысвечаным Дню МОАП, узнагародзілі не толькі лепшых маладых памочнікаў міліцыі, але і супрацоўнікаў органаў унутраных спраў, якія ўнеслі значны ўклад у развіццё моладзевых атрадаў.

Алег Шведаў, "Віцебскія весці"