Мамалагічны цэнтр створаны ў Віцебску

Мамалагічны цэнтр створаны ў Віцебску: спецыялізаванае аддзяленне паталогіі малочнай залозы функцыянуе на базе абласнога дыягнастычнага цэнтра, паведаміў карэспандэнту БЕЛТА галоўны ўрач установы аховы здароўя Уладзімір Арэхвы.

Цэнтр паталогіі малочнай залозы нацэлены на раннюю дыягностыку анкалагічных захворванняў, а таксама выяўленне іншых мамалагічных захворванняў. Тут працуюць тры кабінеты ультрагукавой дыягностыкі, ёсць сучасны рэнтгенаўскі маммограф, аперацыйная, дзе праводзяцца пункцыі малочнай залозы і біяпсія, прыём пацыентак ажыццяўляе мамалог-анколаг.

Віцебская вобласць стала першым рэгіёнам краіны, дзе мамалагічны цэнтр вынесены за межы анкалагічнага дыспансера і функцыянуе ў агульнай лячэбнай сістэме. "Наш цэнтр прынцыпова адрозніваецца тым, што не замыкаемся толькі на пацыентах, у якіх ужо выяўлена онкапаталогія, а ахоплівае і здаровых. Пры такіх падыходах шансы выяўлення захворвання на ранніх стадыях, а значыць, вылячэння, значна павышаюцца", - падкрэслілі ў дыягнастычным цэнтры.

Для таго каб зрабіць працу новага цэнтра максімальна эфектыўнай, наладжваецца сувязь з паліклінікамі, якія і накіроўваюць жанчын для абследавання ў новае аддзяленне дыягнастычнага цэнтра. "Ствараецца рэгістр людзей, якія прайшлі ў нас дыягностыку. Даныя з вынікамі даследаванняў адпраўляем па электроннай пошце не толькі ў паліклініку па месцы жыхарства, але і ў андыспансер", - сказаў Уладзімір Арэхвы, падкрэсліўшы, што ў далейшым спецыялісты цэнтра будуць назіраць за тым, як пацыенты праходзяць лячэнне і пры неабходнасці выклікаць на паўторныя агляды.

Намеснік галоўнага ўрача Віцебскага абласнога дыягнастычнага цэнтра па арганізацыйна-метадычнай рабоце Ірына Кулакова адзначыла, што раней такога роду даследаванні праводзіліся ў розных месцах, у асноўным у анкалагічным дыспансеры і жаночых кансультацыях. Акрамя гэтага агляд малочных залоз праводзілі ўсе ўрачы-спецыялісты, да якіх прыходзілі на прыём жанчыны. "На практыцы атрымлівалася так, што жанчынамі займаліся ўсе і ніхто канкрэтна. Спецыялізаваны маммалагічны цэнтр дае магчымасць праводзіць скрынінг, весці дыягностыку, выдаваць рэкамендацыі па дыспансерным вядзенні, вызначаць, калі і дзе пацыентка павінна праходзіць кантроль", - адзначыла Ірына Кулакова, падкрэсліўшы, што ў цэнтры ствараецца таксама рэгістр жанчын высокай рызыкі па развіцці анкалагічных захворванняў.

У дыспансеры плануюць развіваць маммалагічную службу, і ўжо ў першым квартале бягучага года на ўзбраенне медыкаў паступіць яшчэ адзін маммограф, будзе пашырацца і штат спецыялістаў. "У перспектыве хацелася б увесці ў практыку выезды на раёны з даследаваннем жанчын. Цяпер, улічваючы тое, што мы толькі пачалі працу па гэтым пілотным праекце, працуем з віцебскімі паліклінікамі, паступова пашыраючы ахоп жанчын", - адзначыла суразмоўніца.

Касаючыся планаў развіцця медыцынскай установы, Ірына Кулакова адзначыла, што абласному дыягнастычнаму цэнтру перададзена жаночая кансультатыўная паліклініка, якая будуецца зараз у Віцебску. "Там будуць сабраны спецыялісты, якія займаюцца медыка-генетычным кансультаваннем і праблемамі бясплоддзя, таксама будзе весці прыём урач-маммолаг. Гэта будзе комплексны кансультатыўны цэнтр для жанчын рознага ўзросту. Пацыентка зможа прайсці ўсіх неабходных спецыялістаў, зрабіць усю дыягностыку, атрымаць кансультацыю гінеколага, а пры парушэннях рэпрадуктыўнай сістэмы яшчэ і пралячыцца на дзённым стацыянары", - падзялілася планамі намеснік галоўнага ўрача.

Алена Ціханава