«Марка» адкрывае найбуйнейшы ў Віцебскай вобласці гандлёва-лагістычны цэнтр

Урачыстае адкрыццё гандлёва-лагістычнага цэнтра (ГЛЦ) холдынгу "Беларуская гарбарна-абутковая кампанія "Марка" адбудзецца 17 снежня, паведамілі ў канцэрне "Беллегпрам".

Гэта першы аб'ект такога маштабу ў Віцебскай вобласці. Яго будаўніцтва і ўвод у эксплуатацыю праводзіцца ў кантэксце інвестыцыйнага праекта "Стварэнне вытворчых магутнасцей па выпуску абутку да 5 млн пар у год і рэканструкцыя футравай фабрыкі з улікам стварэння холдынгу "Беларуская гарбарна-абутковая кампанія "Марка" на 2013-2024 гады". Праект ажыццяўляецца ў адпаведнасці з указам аб мерах па развіцці гарбарна-футравай вытворчасці і вытворчасці абутку.

Для вытворчых кампаній, якія ўваходзяць у склад холдынгу, гэты аб'ект стане адзіным цэнтрам лагістыкі. Калі да гэтага часу аптовыя партнёры вымушаны былі арганізоўваць адгрузкі абутку з трох абуткавых прадпрыемстваў холдынгу згодна з вытворчай спецыялізацыяй кожнага з іх, то пасля запуску ГЛЦ "Марка" адгрузка ўсяго абутку будзе адбывацца цэнтралізавана з аднаго склада. Гэта больш мабільна і зручна для аптовых пакупнікоў. Да таго ж цэнтр знаходзіцца на выездзе з горада (па адрасе Бешанковіцкая шаша, 54), удалечыні ад шчыльнага патоку аўтатранспарту, што дае свабоду курсіравання грузавых аўтамабіляў да лагістычнага цэнтра.

Плошча склада гатовай прадукцыі ГЛЦ складае 10 тыс. кв.м і дазваляе адначасова змясціць мільён пар абутку. У перспектыве складскі комплекс можна будзе пашырыць фактычна ўдвая шляхам узвядзення побач аналагічнага аб'екта. Інжынерная інфраструктура, разлічаная на абслугоўванне плошчы не менш за 20 тыс. кв.м, якраз гэта дазваляе.

Адкрыццё гандлёва-лагістычнага цэнтра "Марка" парадуе не толькі аптовых кліентаў холдынгу, але і рознічных пакупнікоў. Большую частку двух паверхаў гандлёвага комплексу зойме магазін новага для рэгіёна фармату - аўтлет (як правіла, гэта рэалізацыя вырабаў з мінулых калекцый вядомых брэндаў па дэмакратычных цэнах). Ён прадаставіць спажыўцам магчымасць шопінгу з еўрапейскім размахам у фармаце пастаянных распродажаў. Тут можна будзе набыць асартымент абутку Marko, Bravo, "Белкельме", сумак і скур галантарэйных вырабаў прадпрыемства "ВитМа", вырабы Віцебскага футравага камбіната.

Кацярына Князева, БЕЛТА.