Масленічных лялек з усіх рэгіёнаў Віцебшчыны пакажуць на свяце ў Гарадку

Конкурс-прэзентацыя масленічных лялек упрыгожыць 21 лютага абласное свята "Масленічны разгуляй" у Гарадку, паведамілі карэспандэнту БЕЛТА ў Віцебскім абласным метадычным цэнтры народнай творчасці.

"Усе раёны прывязуць свае пудзілы Масленіцы, кожнае з іх мае мясцовыя адметныя асаблівасці - матэрыялы, вышыўку і іншае. Свята пачнецца з урачыстага шэсця раёнаў на чале з гэтымі масленічнымі лялькамі. Але спальваць будзе толькі гарадзенскую, а астатнія пудзілы адправяцца назад на сваю малую радзіму, іх спаляць на мясцовых гуляннях 22 лютага", - патлумачыла вядучы метадыст па народных традыцыях і абрадах Ірына Шаціла.

Асноўныя гулянні разгорнуцца на абноўленай да "Дажынак" цэнтральнай плошчы Гарадка. Гасцей чакае канцэртная праграма з аўтэнтычнымі масленічнымі абрадамі, песнямі, танцамі, карагодамі. Тут жа пройдуць выставы рамёстваў і народнай кухні, размесцяцца дзіцячая і дарослая гульнявыя пляцоўкі, прысвечаныя традыцыйным народным гульням рэгіёнаў. Пацешыць гасцей конкурс частушак, а ад марозу сагрэе гарачы чай. І, вядома, будуць частаваць блінамі.

Такі свята абласнога маштабу на Віцебшчыне пройдзе ўпершыню.

Як дабрацца на гарадзенскі "Масленічны разгуляй" з Віцебска, глядзіце тут.

Кацярына Князева,