Майстры з Віцебскай вобласці, Мінска, Магілёва прадставяць свае працы на конкурсе лоскутнага шыцця ў Віцебску

Майстры з паловы раёнаў Віцебскай вобласці, а таксама Мінска і Магілёва прадставяць свае работы на свяце-конкурсе лоскутнага шыцця "Здраўнеўская палітра-2015" у Віцебску, паведамілі ў абласным метадычным цэнтры народнай творчасці.

Такі абласны свята-конкурс праводзіцца штогод з мэтай развіцця народных мастацкіх традыцый у дэкаратыўна-прыкладной творчасці, узбагачэння нацыянальных асаблівасцей лоскутнага шыцця сучаснымі тэндэнцыямі. Сёлетні конкурс называецца "Святло зямлі". Лепшыя работы ў тэхніцы лоскутнага шыцця з верасня прадстаўлены ў выставачных залах абласнога краязнаўчага музея і абласнога метадычнага цэнтра народнай творчасці (АМЦНТ). Экспануюцца работы з Віцебска, Мінска, Магілёва, а таксама майстроў Цэнтраў (Дамоў) рамёстваў з Ліёзна, Верхнядзвінска, Шуміліна, Дуброўна, Мёраў, Докшыц, Гадка, Наваполацка, Шаркаўшчыны, Глыбокага. Вопыт народных майстроў пераймаюць студэнты віцебскіх ВНУ і каледжаў з факультэтамі (аддзяленнямі) мастацкага профілю, якія таксама ўдзельнічаюць у выставе.

Важнай задачай, адзначаюць арганізатары, з'яўляецца фарміраванне цікавасці да мастацкай спадчыны Ільі Рэпіна, а таксама эстэтычнае выхаванне маладога пакалення на аснове традыцый народнай творчасці. Спецыяльна для гэтага ў выставачным зале АМЦНТ сёння пройдуць майстар-класы па вырабе аб'ёмных і плоскасных вырабаў, у тэхніцы арт-квілт і змешанай. А ў 14.00 свята перамесціцца ў музей-сядзібу Рэпіна "Здраўнёва". Тут гасцей і ўдзельнікаў чакаюць экскурсія, наведванне выставы лоскутнага шыцця, дэгустацыя страў нацыянальнай кухні, выступленне народных музычных калектываў і прадстаўленні тэатраў моды з Віцебскай вобласці.

Кацярына Князева, БЕЛТА.