МБРР выдзеліў 16,6 млн еўра на мадэрнізацыю і рэканструкцыю 30 школ у Віцебскай вобласці

За кошт крэдытаў Міжнароднага банка рэканструкцыі і развіцця (МБРР) у Віцебскай вобласці ў 2021-2022 гадах маюць намер правесці рэканструкцыю і мадэрнізацыю 30 устаноў сярэдняй адукацыі, паведаміў начальнік галоўнага ўпраўлення па адукацыі аблвыканкама Дзмітрый Хома.

МБРР на 30 аб'ектаў выдзеліў 16,6 млн еўра, ужо асвоена больш за 7,5 млн еўра. "Сёння рамонт праведзены альбо працягваецца ў 27 установах адукацыі. Мы паставілі перад сабой задачу, нягледзячы на тое, што праграма банка разлічана на 2021-2025 гады, асноўную працу завяршыць у гэтым годзе. На 2022-і застануцца тры школы", - адзначыў Дзмітрый Хома.

Ён таксама распавёў, што ў вобласці пры падрыхтоўцы да новага навучальнага года праведзены вялікія рамонтныя работы. Установы адукацыі гатовыя прыняць дзяцей, закуплена дастаткова абсталявання. "У гэтым годзе за парты селі 114 923 дзіцяці - гэта на 1 тыс. больш, чым у мінулым годзе. У першы клас пайшлі 12 375 дзяцей", - дадаў начальнік галоўнага ўпраўлення па адукацыі аблвыканкама.

У Віцебскай вобласці працуе 321 установа сярэдняй адукацыі. Для падвозу сельскіх дзяцей набыта 33 новыя аўтобусы, усяго іх у рэгіёне 287 адзінак. За апошнія гады аўтапарк практычна на 100% абнавілі.

БЕЛТА.