Мемарыял у памяць расстраляных фашыстамі мірных жыхароў збіраюцца адкрыць у Полацку ў 2011 годзе

19 ліпеня, Віцебск /Дзіяна Курыло - БЕЛТА/. Да 70-годдзя пачатку Вялікай Айчыннай вайны ў Полацку збіраюцца ўзвесці мемарыяльны комплекс на месцы масавага расстрэлу і пахавання ваеннапалонных і мірных грамадзян ва ўрочышчы "Пяскі". Полацкі гарсавет і гарвыканкам падтрымалі ініцыятыву Полацкай гарадской арганізацыі грамадскага аб'яднання "Беларускі фонд міру" і прынялі рашэнне аб узвядзенні мемарыяла, паведаміла карэспандэнту БЕЛТА начальнік аддзела ідэалагічнай работы Полацкага гарвыканкама Наталля Ганебная. Па архіўных даных Полацкай абласной Надзвычайнай камісіі па ўліку шкоды і расследаванні злачынстваў нямецка-фашысцкіх акупантаў і іх памагатых, у раёне "Пяскоў" знаходзіцца месца масавага знішчэння ад 40 да 150 тыс. ваеннапалонных і мірных жыхароў. У 1993-1994 гадах спецыялізаваным пошукавым батальёнам Міністэрства абароны Беларусі на гэтым месцы праводзіліся раскопкі, якія пацвердзілі факт пахавання звыш 38 тыс. чалавек. Аднак да цяперашняга часу дакладная колькасць пахаваных дакладна не пацверджана. У 2003 годзе ва ўрочышчы "Пяскі" быў устаноўлены сціплы абеліск, але стан пахавання, дзе спачываюць астанкі дзясяткаў тысяч чалавек, не адпавядае патрабаванням, якія прад'яўляюцца да ўтрымання месцаў масавых пахаванняў, дадала Наталля Ганебная. Дызайнерская прапанова мемарыяла ва ўрочышчы "Пяскі" распрацавана. Адкрыццё мемарыяла плануецца правесці ў Дзень усенароднай жалобы і смутку 22 чэрвеня 2011 года. Фінансаванне работ прадугледжваецца весці за кошт сродкаў спонсараў і добраахвотных ахвяраванняў. Па словах Наталлі Ганебнай, ініцыятыву мясцовага аддзялення Фонду міру падтрымалі таксама Полацкі гарадскі Савет Беларускага грамадскага аб'яднання ветэранаў, грамадская арганізацыя "Беларускі саюз афіцэраў", грамадская арганізацыя "Полацкі яўрэйскі культурны цэнтр", нямецкі горад-пабрацім Фрыдрыхсхафен, грамадскія арганізацыі і аб'яднанні горада.